EMRAT/ Aksident i rëndë në Lushnjë, një i vdekur dhe një i plagosur

Një aksident i rëndë me pasojë vdekjen e një personi është regjistruar pasditen e kësaj të marte në një aks rrugor rural që lidh fshatin Bilaj me pjesën tjetër të zonës.

Mësohet se dy mjete, një automjet tip "Volkswagen", i drejtuar nga Viktor Doda, dhe një "Benz", me drejtues Kristjan Laska, janë përplasur me njëri-tjetrin në rrethana që ende po hetohen.

Si pasojë e përplasjes së fortë, drejtuesi i automjetit "Volkswagen", Viktor Doda, banor i fshatit Bilaj, ka humbur jetën në vendngjarje. Ndërkohë, drejtuesi i mjetit tip "Benz", Kristjan Laska, ka mbetur i plagosur rëndë dhe është transportuar me urgjencë drejt Spitalit të Traumës për të marrë ndihmë të specializuar mjekësore.

Sipas të dhënave paraprake të Policisë, dyshohet se shkak i aksidentit ka qenë shpejtësia e lartë me të cilën lëvizte automjeti tip "Benz". Grupi hetimor ka kryer veprimet në vendngjarje dhe po punon për të zbardhur plotësisht shkaqet dhe rrethanat e aksidentit.