EMRAT/ Dënohen dy të rinjtë shqiptarë, u kapën me kokainë në Angli

Dy të rinj shqiptarë nga Burton-on-Trent janë dënuar nga gjykata në Angli, pasi policia u gjeti kokainë, para cash dhe telefona celularë gjatë një operacioni kundër shpërndarjes së drogës.

Taulant Dosku, 27-vjeç, u deklarua fajtor për posedim të kokainës me qëllim shpërndarjen, përfitim ose posedim të pasurisë kriminale, si dhe për drejtim automjeti pa siguracion dhe pa respektuar kushtet e licencës së drejtimit.

Daniel Dralo, 29-vjeç, u deklarua fajtor për përfshirje në shpërndarjen e kokainës dhe për përfitim ose posedim të pasurisë kriminale.

Ngjarja u regjistrua në muajin qershor, kur Dosku po drejtonte një automjet tip Ford Kuga ngjyrë gri dhe ishte i vetmi person në bord. Automjeti u ndalua nga efektivët e njësisë së krimit të organizuar në zonën e Horninglow.

Gjatë kontrollit, policia gjeti 13 qese të vogla me kokainë, 1030 paund cash dhe një iPhone.

Më pas, efektivët shkuan në një adresë në qytet, ku Dralo u paraqit te dera dhe u kontrollua nga policia. Në posedim të tij u gjetën 290 paund dhe dy iPhone.

Dosku u dënua me 1 vit e 8 muaj burg, ndërsa Dralo mori një dënim prej 2 vitesh e 3 muajsh burg, të pezulluar për dy vite, raportojnë mediat britanike.

Pas vendimit, drejtuesja e njësisë së Krimit të Organizuar dhe Madhor, Victoria Downing, deklaroi se policia do të vijojë operacionet kundër grupeve që merren me shpërndarjen e drogës dhe veprave kriminale me ndikim të lartë në komunitet.