16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
EMRAT/ Katër elektricistë të vdekur në pak muaj, kush mban përgjegjësi për sigurinë në terren?
PiranjatPërditësimi i fundit 12 September 2026, 14:39
Një tjetër rast ku një elektriçist humb jetë gjatë punës është regjistruar në vendin tonë.
Ngjarja ka ndodhur sot në zonën e Belshit, ku elektricisti i OSHEE-së, Klajd Zekthi, 32 vjeç ka humbur jetën teksa ndodhej në terren pas stuhisë që përfshiu zonën.
Raportohet se pas motit të keq dhe dëmtimeve të shkaktuara në rrjetin elektrik, ekipet e OSHEE-së kanë dalë në terren për të ndërhyrë dhe rikthyer furnizimin me energji elektrike.
Gjatë ndërhyrjes teknike 32-vjeçari dyshohet se ka rënë në kontakt me energjinë elektrike dhe, si pasojë e goditjes, ka humbur jetën.
Klajdi Zekthi
Por tragjedia e Belshit nuk është një rast i izoluar.
Ky është rasti i katërt i raportuar gjatë vitit 2026 ku një punonjës i sektorit të rrjetit elektrik humb jetën gjatë punës. Dhe kur vdekjet përsëriten me të njëjtën skemë, në shtyllë, në linjë, në terren, atëherë nuk flitet më thjesht për aksident por për nji sistem sigurie që nuk po mbron njerëzit e vet.
Në shkurt, në fshatin Rrilë të Lezhës, humbi jetën 27-vjeçari Mark Prenga, elektricist i OSHEE-së, pasi ra në kontakt me rrymën gjatë riparimit të një defekti në shtyllë. Pas ngjarjes u proceduan katër punonjës të tjerë të OSHEE-së për shkelje të rregullave të sigurisë teknike.
Më 22 korrik, në Himarë, humbi jetën Bashkim Boçi, 55 vjeç, punonjës i OSHEE-së prej vitesh. Ai po punonte për rikthimin e energjisë pas stuhisë, kur dyshohet se iu shkëput rripi i sigurisë dhe ra nga një shtyllë rreth 9 metra e lartë.
Ndërsa më 11 shtator, në Marglliç të Patosit, humbi jetën Ermal Debrova, 46 vjeç, nga Elbasani, pranë një shtylle elektrike të rrëzuar.
Sipas raportimeve mediatike, ai punonte për një kompani private që operonte në zonë, ndaj rasti nuk mund të përfshihet në bilancin e punonjësve të OSHEE-së.
Megjithatë, katër ngjarjet kanë një element të përbashkët: punonjës që dalin në terren për të ndërhyrë në rrjet dhe që nuk kthehen më në shtëpi.
Kur të njëjtat skena përsëriten brenda pak muajsh, pyetja nuk mund të jetë vetëm se si ndodhi aksidenti. Pyetja është nëse janë zbatuar në çdo rast të gjitha masat që duhet të parandalonin një fatalitet.
A ishte ndërprerë energjia në linjën ku po punohej? A kishte urdhër pune të dokumentuar dhe procedurë të qartë sigurie? A ishin kontrolluar pajisjet mbrojtëse përpara ndërhyrjes? A ishte vlerësuar rreziku i punës në terren, veçanërisht pas stuhive dhe dëmtimeve të rrjetit?
A kishin punonjësit kushtet dhe kohën e nevojshme për të zbatuar të gjitha protokollet? Dhe mbi të gjitha: çfarë ndryshon pas çdo tragjedie?
Në njoftimet e para, ngjarjet shpesh përmblidhen me fraza si “ra në kontakt me rrymën”, “ra nga shtylla” apo “po riparonte një defekt”. Por pas këtyre fjalive qëndron një zinxhir përgjegjësish që duhet hetuar deri në fund.
Nëse ka pasur shkelje të protokolleve, përgjegjësia duhet të përcaktohet. Nëse protokollet janë zbatuar, atëherë duhet shpjeguar se çfarë tjetër dështoi për të mbrojtur punonjësin.
