EMRAT/ Policia jep detajet nga zjarri në Shkodër: Trupat u zbuluan nën rrënoja, familja sapo ishte kthyer nga Gjermania

Forcat zjarrëfikëse kanë gjetur të pajetë edhe nënën e dy fëmijëve në banesën, e cila u përfshi nga flakët ditët e sotme në Postribë të Shkodrës. Më herët, forcat zjarrëfikëse gjetën edhe dy fëmijët, të moshës 2 dhe 3 vejç, të cilët së bashku me nënën e tyre, 24 vjeçaren Bleona Çelaj, kishin shkuar në banesën e vjetër që është përfshirë nga flakët. 

Ngjarja ndodhi në lagjen Plisht të fshatit Domen, në njësinë administrative Postribë, në Shkodër. Trupat e viktimave janë gjetur mes rrënojave të banesës së shkrumbuar plotësisht. Sipas informacioneve paraprake, familja jeton në fshatin Golem dhe ishte kthyer nga Gjermania më 15 korrik. Nëna kishte shkuar bashkë me dy fëmijët në shtëpinë e prindërve të saj në fshatin Domen për ta pastruar, kur banesa u përfshi nga flakët.

Njoftimi i Policisë:

Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç. Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.

Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë. Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.