Një tjetër protestë qytetare është thirrur këtë të hënë, më 27 korrik, përpara Parlamentit, me thi...
AKTUALITET
EMRAT/ Trafik droge nga Kolumbia, dënohet me burg banda në Itali, mes tyre edhe shqiptarë
PiranjatPërditësimi i fundit 8 Maj 2026, 16:41
Një megaoperacion antidrogë i zhvilluar nga autoritetet italiane ka zbuluar një rrjet të fuqishëm kriminal të përfshirë në trafik ndërkombëtar kokaine, pastrim parash dhe faturime fiktive me vlerë qindra milionë euro. Operacioni i koduar “Tornado”, i koordinuar nga Prokuroria Antimafia e Brescias dhe Guardia di Finanza, përfundoi me dënimin e 15 personave me mbi 103 vite burg në total.
Sipas hetimeve, organizata kriminale kishte ndërtuar aktivitetin e saj mbi dy shtylla kryesore: trafikun e drogës nga Amerika Latine drejt Italisë dhe pastrimin e fitimeve përmes një skeme të sofistikuar financiare.
Autoritetet italiane bëjnë me dije se rrjeti kishte arritur të trafikonte rreth 3 ton kokainë nga Kolumbia, përmes Spanjës dhe Holandës, ndërsa një nga bazat e magazinimit ndodhej në Palazzolo të Brescias.
Në qendër të dosjes hetimore rezulton 43-vjeçari me origjinë kineze Lihe Hu, rezident në Travagliato, i konsideruar nga prokurorët si “bankieri okult” i organizatës kriminale. Ai u dënua me 5 vite e 4 muaj burg, ndërsa dyshohet se menaxhonte qarkullimin e milionave të përfituara nga trafiku i drogës.
Sipas hetuesve, paratë mblidheshin cash nga trafikantët dhe më pas pastroheshin përmes transfertave bankare nga Kina drejt llogarive në Shqipëri, Spanjë dhe Brazil. Nga hetimet ka rezultuar se në periudhën 2019-2021 rrjeti kishte krijuar fatura false me vlerë rreth 325 milionë euro për të legalizuar fitimet kriminale.
Në skemë përfshiheshin kompani fantazmë dhe shoqëri “filtër”, ndërsa sipërmarrës të ndryshëm paguanin për të siguruar faturat false, duke marrë më pas një pjesë të parave të pastruara kundrejt komisioneve deri në 4%.
Një rol të rëndësishëm në trafikun e kokainës kishin edhe shtetas shqiptarë. Dënimin më të lartë mes tyre e mori Jurgen Havalja, 41 vjeç, banues në Genova, i cili u dënua me 13 vite e 4 muaj burg. Sipas autoriteteve, ai organizonte transportin e kokainës nga Spanja drejt magazinave në Brescia.
Ndërkohë, shqiptari tjetër Mariglen Beqja, 44 vjeç, tashmë i arrestuar, u dënua me 13 vite e 2 muaj burg. Ai akuzohet për ruajtjen dhe magazinimin e lëndës narkotike në bazën operative të grupit në Brescia.
Në dosjen hetimore përmenden gjithashtu dhjetëra episode të trafikut dhe shitjes së drogërave të forta, përfshirë kokainë, heroinë dhe hashash.
Mediat italiane raportojnë se hetimi ka ngritur shqetësime për ekzistencën e të ashtuquajturave “banka të fshehta kineze”, të cilat dyshohet se operojnë në zona të ndryshme industriale të Italisë dhe përdoren për financimin e aktiviteteve kriminale dhe pastrimin e parave.
