Boksieri shqiptar, Kristian Prenga, u mposht me nokaut në raundin e dytë nga Antoni Xhoshua, në sfidën që u mbajt në Xhedah t&eu...
AKTUALITET
Emri/ Me mbi 300 mijë paund drogë, kush është 37-vjeçari shqiptar i arrestuar. Si tentoi t’i fshihej policisë
PiranjatPërditësimi i fundit 13 Maj 2026, 19:43
Një shqiptar përballet me dënim me burg pasi u zbulua se prodhonte kanabis me vlerë deri në 334 mijë paund në East Renfrewshire.
Genc Milloshi pranoi se kishte kultivuar kanabis brenda një njësie industriale në Cartside Works në Busby. 37-vjeçari pretendon se punonte si “kopshtar” në njësinë në Fields Road në nëntor të vitit të kaluar, kur policia bastisi ish-punishten e riparimit të makinave.
Pas bastisjes u sekuestruan mbi 500 bimë kanabisi, që vlerësohet se mund të prodhonin drogë me vlerë deri në 334 mijë paund. Prokurori Jason Stark i tha Gjykatës së Paisley-t se policia kishte marrë informacione për erë kanabisi që vinte nga ambientet në Cartside Works dhe më pas kreu verifikime lokale, duke mësuar se kush ishte personi përgjegjës për dhënien me qira të disa pronave në zonë.
Stark shpjegoi:“Rreth orës 14:30 të së enjtes, më 13 nëntor, policia shkoi në vendngjarje dhe u takua me drejtorin e kompanisë. Kishte erë kanabisi që dukej se vinte nga brenda godinës. Policia pa gjithashtu shtylla druri të mbështetura pas derës. Drejtori i pronës ishte i shqetësuar për përdorimin e ambienteve, ndaj përdori çelësat për të hapur drynat e derës kryesore, por ato nuk funksionuan. Ai i dha leje policisë të hynte me forcë.
Policia hyri dhe menjëherë konstatoi shenja të qarta të një kultivimi në shkallë të gjerë kanabisi brenda një strukture të madhe prej druri. Më pas policia pa të akuzuarin, i cili nxori kokën nga cepi i djathtë i dhomës së kultivimit. Sapo pa policinë, i akuzuari u largua më thellë në strukturën prej druri drejt pjesës së pasme të godinës.
Policia vuri re se për shkak të reshjeve të dendura, uji pikonte mbi instalimet elektrike dhe mbi matësin elektrik, si edhe mbi strukturën prej druri. Kjo ngriti shqetësime për sigurinë e godinës. Kishte rrezik të dukshëm zjarri dhe struktura dukej e brishtë dhe e lagur.
Policia kreu kontroll në katin përdhes sa më mirë që mundi, për të parandaluar që i akuzuari të dëmtohej. Oficerët nuk arritën ta gjenin gjatë kontrollit, por zbuluan një zonë të vogël banimi që ishte në gjendje rrëmujë.”
Gjykata dëgjoi se kultivimi ishte i përfshirë brenda strukturës prej druri me bimë në "faza të ndryshme të rritjes".
Ekipit të Policisë së Skocisë iu kërkua të merrte pjesë në një përpjekje për të gjetur të akuzuarin. Ekipi e gjurmoi Milloshin në një boshllëk të vendosur në këndin e djathtë të njësisë industriale, midis murit të jashtëm dhe strukturës prej druri të ndërtuar posaçërisht, dhe ai u arrestua. Stark i tha gjykatës se policia gjeti gjithashtu 43 ventilatorë dhe 152 njësi ndriçimi.
Në total, kishte 558 bimë, me 249 prej tyre në madhësi më të vogël. Gjykatësi e shtyu dënimin deri më 5 qershor që të përgatiteshin raportet e të dhënave. Ndërkohë, Millosh u la në paraburgim. /PiranjatNews/
