Era përhap zjarrin drejt banesave në Krujë, banorët largojnë fëmijët dhe të moshuarit, presin pemët për të penguar flakët

Tri vatra zjarri vijojnë të jenë aktive në Krujë, në lagjet Abaze dhe Boje, si dhe në vendgrumbullimin e mbeturinave në Kameras.

Në lagjen Abaze, zjarri vijon në zonën e Kroit të Madh. Atje, banorët kanë nisur të marrin masa duke larguar fëmijët, të moshuarit dhe sendet me vlerë.

Helikopterët janë larguar, ndërsa situata nuk duket e mirë për shkak të erës që po favorizon përhapjen e zjarrit. Situatë e njëjtë është edhe në lagjen Boje, ku zjarri vijon të jetë aktiv.

Ndërkohë, është riaktivizuar vatra në vendgrumbullimin e mbeturinave në Kameras.

Në të trija vatrat po ndërhyhet nga toka me mjete dhe njerëz ndërkohë që era fryn me intensitet.