Flakët përfshijnë tokën bujqësore në Elbasan, izolohet vatra pranë zonave të banuara

Një vatër zjarri me rrezikshmëri të lartë është regjistruar në lagjen “Skënderbej” në Elbasan, ku flakët kanë përfshirë me shpejtësi një sipërfaqe të konsiderueshme të mbjellë me pemë dhe barishte të thata. Pozicionimi i vatrës pranë zonës së banuar ka ngjallur panik te banorët.

Menjëherë pas kësaj situate kanë ndërhyrë Shërbimi i Zjarrfikësve, të cilët kanë bërë të mundur izolimin e vatrës dhe marrjen e situatës nën kontroll, duke shmangur dëmtimin e shtëpive.

Nisur nga kjo ngjarje, autoritetet u kanë bërë apel të përsëritur qytetarëve që të tregojnë kujdes maksimal gjatë kësaj periudhe me rrezikshmëri të lartë. Zjarrfikësit rikujtojnë se në këto ditë të nxehta, edhe pakujdesia më e vogël mund të shkaktojë pasoja fatale, duke u kthyer në një kërcënim serioz për pronën, pasuritë dhe vetë jetën e njerëzve.