FOTO/ Kush është çifti i bashkëshortëve që u vra nga ish-i fejuari i vajzës, i akuzonte se nuk i kthenin paratë

Kosta dhe Belere Plaka, ky është çifti i bashkëshortëve që u vra nga ish-dhëndri i tyre Nertil Buzi, në Roskovec. Ata u përcollën sot për në banesën e fundit ndërsa Buzi, që i dha fund edhe jetës së tij do të varroset nesër. Krimi i rëndë dyshohet se ndodhi pas konflikteve të vazhdueshme që 35-vjeçari kishte me të fejuarën dhe familjen e saj, ndërsa pretendonte se ata nuj i kthenin një shumë të madhe parash, që ua kishte dërguar kur punonte si emigrant në Angli.

Ceremonia mortore për autorin e ngjarjes, Refit (Nertil) Buzi, do të zhvillohet paraditen e së dielës. Sipas burimeve, kjo është vendosur për të shmangur çdo tension të mundshëm mes familjeve, pasi ato jetojnë në të njëjtën zonë dhe ceremonitë zhvillohen në të njëjtat varreza.

Ngjarja që tronditi Vidhishtin dhe mbarë vendin ndodhi mëngjesin e së premtes, kur 35-vjeçari shkoi në banesën e ish-partneres së tij dhe qëlloi me armë ndaj prindërve të saj. Kosta Plaka humbi jetën në vend, ndërsa Belere Plaka ndërroi jetë disa orë më vonë në spital, duke mos mundur t’u mbijetojë plagëve.

Pas krimit, autori mori peng ish-partneren dhe u largua nga vendngjarja. Pas disa orësh negociata me policinë, ai i dha fund jetës brenda automjetit të tij, duke mbyllur në mënyrën më tragjike një ngjarje që ka lënë pas dhimbje të thellë.