Ilir Meta ka reaguar përmes një postimi në Facebook lidhur me konfliktin mes GJKKO dhe Dhomës Kombëtare të Avokatisë, duke pr...
AKTUALITET
Gjykata rrëzon kërkesën e Ndrecës për pavlefshmëri të përgjimeve
PiranjatPërditësimi i fundit 19 May 2026, 20:00
Gjykata e Posaçme e Shkallës së Parë rrëzoi të martën më 19 maj përmes një vendimi të ndërmjetëm, kërkesën e përfaqësuesit ligjor të ish-deputetit socialist, Plarent Ndreca, për pavlefshmërinë dhe papërdorshmërinë në procesin penal ndaj tij të përgjimeve të kryera, përpara se t’i regjistrohej emri si person nën hetim.
Avokati i Ndrecës, Ermal Yzeiraj e ka ngritur këtë pretendim edhe më parë, ndërkohë që prokurorja e çështjes, Dorina Bejko e ka konsideruar atë të pabazuar.
Sipas Yzeirajt, në kohën kur është kryer përgjimi i Ndrecës, SPAK ka deklaruar në gjykatë se ishte i dyshuar për veprën penale për të cilën po hetohej dhe duhej të ishte regjistruar emri i tij si person nën hetim. Sipas avokatit, kështu Ndrecës do t’i lindte e drejta të të jepte shpjegime dhe të kundërshtonte veprimet e prokurorisë që i konsideron të paligjshme.
Prokurorja Bejko ka mbrojtur idenë në seancat e mëparshme se është në vlerësimin e prokurorit se kur do të regjistrohet emri i personit në procedimin penal. Sipas saj, nuk mund të regjistrohet emri i personit nën hetim, nëse nuk janë siguruar prova që të çojnë tek dyshimi i arsyeshëm. Edhe gjatë seancës të martën, palët u qëndruan të njëjtave kërkime dhe parashtrime.
Gjykata pasi u tërhoq në dhomë këshillimi, vërejti se ligjvënësi nuk ka përcaktuar që përgjimi të kryhet vetëm kur personi është nën hetim.
“Regjistrimi i emrit si person nën hetim, është veprim që përmban elementë formalë dhe elementë substancialë, që përcaktojnë dyshimin e arsyeshëm për të marrë personin nën hetim. …Ligjvënësi nuk ka përcaktuar një moment fiks se kur bëhet regjistrimi i emrit të personit nën hetim”, konstatoi kryesuesja e trupit gjykues, Rudina Palloj dhe shtoi se, është prokurori që e ka tagrin për të vendosur kur ka dyshime të arsyeshme.
Gjykata i rrëzoi si të pabazuara pretendimet e mbrojtjes dhe pas përfundimit të shqyrtimit të kërkesave paraprake, u vendos çelja e shqyrtimit gjyqësor.
Seanca u shty për në datën 3 qershor, në orën 09:00, kur prokuroria do të parqesë analizën e provave të çështjes.
Sipas SPAK, një grup zyrtarësh dhe ish-zyrtarësh të disa institucioneve, akuzohen se nën udhëheqjen e deputetit socialist, Plarent Ndreca favorizuan në shkelje të ligjit arkitektin Gjon Radovani për të fituar tendera me vlerë 34 milionë lekë. Në kohën e kryerjes së veprës së dyshuar penale, Ndreca mbante pozicionin e sekretarit të Përgjithshëm të Ministrisë së Brendshme.
Në tetor të vitit të kaluar, çështja ndaj Ndrecës u nda nga ajo e të pandehurve të tjerë, pasi ish-deputeti socialist kërkoi të gjykohej me procedurën e zakonshme. Të akuzuarit e tjerë janë duke u gjykuar me procedurën e shkurtuar./ Reporter.al
