Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
AKTUALITET
Gjykatës së Durrësit “i zhduken” 8 kinezet e prostitucionit, bën “thirrje publike” për gjetjen e tyre
PiranjatPërditësimi i fundit 3 May 2026, 10:30
Në 6 Maj 2026, Gjykata e Durrësit ka caktuar seancës për nisjen e gjykimit ndaj 8 shtetaseve kineze, të akuzuara për “trafikim personash të rritur”, “prostitucion” dhe “shfrytëzim prostitucioni”, të arrestuara në flagrancë në një operacion të Policisë së Durrësit në dhjetor të vitit 2024.
Por, me shumë mundësi, seanca do të shtyhet, për shkak se asnjë prej të pandehurave nuk do të jetë në sallën e gjyqit. Dhjetë vajzat dhe gratë fillimisht u mbajtën në arrest në burg. Më tej, gjykata i zbuti masat e sigurimit, duke vendosur që ato të hetohen në gjendje të lirë nga Prokuroria e qytetit bregdetar.
Tashmë që hetimi ka përfunduar dhe ato duhet të përballen me ligjin shqiptar, asnjë prej tyre nuk gjendet në adresën e deklaruar të qëndrimit.
Në këto kushte, Gjykata e Durrësit ka vendosur t’i njoftojë të pandehurat për nisjen e procesit gjyqësor nëpërmjet “shpalljes publike”, një ndër format e fundit që parashikon Kodi i Procedurës Penale për vënien në dijeni të personave të interesuar.
Në 23 Prill 2026, gjyqtarja Emirjana Dimo ka nënshkruar nga një “shpallje publike” për secilën prej shtetaseve kineze, duke i njoftuar mbi zhvillimin e seancës gjyqësore.
Në total janë shpallur 8 njoftime publike, në drejtim të: (1) Yanxia Zhang, (2) Yang Jing, (3) Wuang Fen, (4) Tang Jing, (5) Qiaolan Zhang, (6) Lin Lin, (7) Li You, (8) Guangcheng Lin.
Gjykata, në shpalljen publike, thotë se “…Duke qenë se shtetaset, në cilësinë e të pandehurës në çështjen penale, nuk janë arritur të njoftohen në adresë me anë të fletë-thirrjes, njoftimi për zhvillimin e seancës gjyqësore do të kryhet me anën e kësaj shpalljeje”.
“Foleja” e prostitucionit
Në mes të dhjetorit 2024, Policia e Durrësit njoftoi rezultatet e operacionit policor, të cilit i vendosi emrin “Storm”.
Sipas uniformave blu, në vijim të një hetimi 4-mujor me metoda proaktive, u arrestua në flagrancë Guangtai Lin, 50 vjeç nga Kina, i dyshuar për “shfrytëzim prostitucioni”. Gjithashtu, Policia njoftoi se kishte ndaluar edhe 7 shtetase të tjera nga Kina, për veprën penale të “Prostitucionit”, të cilat identifikoheshin vetëm me iniciale: Y. D, T. J, M. H, Q. Zh, Ë. F, J. Y. dhe H. Ch.
Nga veprimet hetimore rezultoi se shtetaset kineze rekrutoheshin nga një grup i strukturuar kriminal, pjesë e të cilit janë shtetasit kinezë G. L. dhe Y. Zh., lindur dhe banues në Kinë.
Këta shtetas, në bashkëpunim me disa shtetas të tjerë në Vietnam, ende të paidentifikuar, pasi i rekrutonin shtetase kineze në Kinë, i dërgonin për kryerjen e aktivitetit kriminal të prostitucionit në Shqipëri, ku siguronin apartamente dhe makina me qira për kryerjen e këtij aktiviteti.
Nga hetimet rezultoi se ky grup kriminal përfaqësohej në Shqipëri, nga shtetasi G. L., i cili bënte menaxhimin dhe kontrollin financiar të shtetaseve kineze që ushtronin aktivitetin kriminal në Shqipëri. Shumat e parave të përfituara nga ky aktivitet kriminal, ky shtetas i dërgonte tek shtetasja Y. Zh., që jeton në Bahrein, e cila bënte ndarjen e parave, 25% të fitimit i merrte për vete, 35% i merrte grupi që drejtonte aktivitetin kriminal nga Vietnami dhe 40% i merrnin vajzat e rekrutuara, si pagë, në bankë.
