Grabitet nga persona të paidentifikuar posta në Yrshek/ Pakot e marra dyshohet se kanë sende të paligjshme

Një grabitje ka ndodhur në orët e para të mëngjesit në magazinat e një kompanie postare në zonën e Yrshekut, ku katër persona të paidentifikuar kanë marrë tre pako dhe janë larguar nga vendi i ngjarjes.

Sipas të dhënave paraprake, ngjarja është regjistruar rreth orës 01:10. Ende nuk dihet përmbajtja e pakove të grabitura, ndërsa kompania po kryen verifikimet për të zbuluar se çfarë dërgesash janë marrë, destinacionin dhe personat që i kishin porositur. Hetimet po vijojnë për identifikimin dhe kapjen e autorëve.

Policia ka gjetur brenda ambienteve të biznesit një pistoletë lodër që dyshohet se u ka rënë grabitësve, ndërsa në zonën e Kasharit është gjetur një automjet duke u djegur, i cili dyshohet se është përdorur për largimin e tyre. Autoritetet po hetojnë edhe mundësinë që njëra prej pakove të ketë pasur sende të paligjshme, por kjo mbetet ende e pakonfirmuar.