“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
AKTUALITET
Griseldi dhe Xhaferri tentuan të vrisnin me eksploziv 57-vjeçarin në Sarandë
PiranjatPërditësimi i fundit 10 Maj 2026, 13:38
Policia ka identifikuar dhe shpallur në kërkim dy autorët e dyshuar të atentatit me eksploziv ndaj 57-vjeçarit Mirash Gjikola, ngjarje e ndodhur më 5 shkurt 2026 në vendin e quajtur “Kryqëzimi i Urës së Vrinës”, në Konispol.
Sipas hetimeve, të dyshuarit janë Griseld Taullaj, 39 vjeç dhe Xhafer Bajo, 39 vjeç, të dy banues në Sarandë.
Ndaj tyre rëndojnë akuzat për veprat penale “Vrasja me paramendim”, kryer në bashkëpunim, mbetur në tentativë”, si dhe “Mbajtja pa leje dhe prodhimi i armëve, armëve shpërthyese dhe municionit”.
Sipas Policisë, autorët kishin vendosur një sasi lënde plasëse në automjetin që drejtohej nga Mirash Gjikola, me qëllim eliminimin e tij. Eksplozivi ishte vendosur në sediljen e pasme të automjetit, bashkë me një aparat celular, i cili dyshohet se do të përdorej për aktivizimin në distancë të shpërthimit. Fatmirësisht, lënda plasëse nuk shpërtheu, duke shmangur një ngjarje me pasoja të rënda.
Në bazë të provave të mbledhura nga strukturat për Hetimin e Krimeve të Rënda në DVP Vlorë dhe Komisariati i Policisë Sarandë, Gjykata e Shkallës së Parë e Juridiksionit të Përgjithshëm Sarandë ka caktuar ndaj dy të dyshuarve masën e sigurisë “Arrest në burg”. Policia bëri me dije se vijon puna intensive për lokalizimin dhe kapjen e tyre, ndërsa në bashkëpunim me Prokurorinë po hetohet edhe për identifikimin e personave të tjerë që mund të jenë përfshirë në atentat.
