Ministria e Drejtësisë ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucioni...
AKTUALITET
Rama ju jep 5 milionë euro të tjera "Tigrave të Vlorës" me tender pa garë
PiranjatPërditësimi i fundit 27 August 2026, 15:00
Gropa financiare e të ashtuquajturve "Tigra të Vlorës" nuk ka të ndalur, teksa fondet publike vazhdojnë të derdhen me thasë për një projekt që deri më sot nuk i ka sjellë asnjë dobi apo kontribut real ekonomisë shqiptare. Korporata Elektroenergjitike Shqiptare (KESH) ka finalizuar një tjetër procedurë prokurimi me negociatë pa shpallje paraprake (tender pa garë), duke i dhënë kompanisë "LA PETROLIFERA ITALO ALBANESE" sh.a një kontratë me vlerë 5.29 milionë euro (ose rreth 493.7 milionë lekë pa TVSH) për depozitimin, ngarkimin dhe shkarkimin e lëndës djegëse për TEC-et lundruese në Vlorë.
Procedura e ndjekur nga Open Spending Data, pa asnjë konkurrencë dhe me një fitues të paracaktuar në tryezat e bisedimeve, e thellon edhe më tej hije-dritën mbi këtë investim luksi me para publike. Me një kohëzgjatje prej 19 muajsh, kjo kontratë shton miliona të tjera mbi faturën e rëndë që publiku shqiptar po paguan për gjeneratorët lundrues – dy centralet e ankoruara prej kohësh në Gjirin e Vlorës që në vend të energjisë, prodhojnë vetëm shpenzime operative dhe kosto mirëmbajtjeje.
Edhe pse qeveria e reklamoi me bujë ardhjen e tyre si shpëtimtare të krizës energjetike, TEC-et lundruese kanë mbetur pa asnjë eficiencë ekonomike, duke mbetur më shumë si "stoli" të shtrenjta mjedisore e financiare sesa një burim real prodhimi energjie.
Kjo aventurë energjetike, e cila vijon të gëlltisë miliona euro pa asnjë transparencë dhe garë, ka ngritur pikëpyetje të shumta edhe në rrethet mediatike. Në vendin tonë është aluduar gjerësisht se sjellja e këtyre centraleve lundruese nuk kishte të bënte me një nevojë emergjente apo strategjike energjetike, por ishte pjesë e një kompromisi politik mes zëvendëskryeministres dhe ministres së Energjisë, Belinda Balluku, dhe ish-ambasadores së SHBA-së në Tiranë, Yuri Kim.
Ndërsa balanca ekonomike mbetet tërësisht negative për qytetarët, fituesit e vetëm nga ky projekt mbeten kompanitë private që marrin kontrata pa garë dhe me shifra marramendëse për shërbime logjistike e depozitimi.
