Luis de La Fuente është shumë pranë nënshkrimit të kontrarës së re me Federatën Spanjolle të futbollit. Traj...
AKTUALITET
“Hajde me ne”/ Si u rrëmbye biznesmeni në Tiranë, tre të rinjtë u hoqën si agjentë të BKH-së (VIDEO)
PiranjatPërditësimi i fundit 13 Prill 2026, 16:18
Një ngjarje rrëmbimi dhe gjobëvënieje ndaj një ndërtuesi 32-vjeçar është regjistruar më 31 mars, ndërsa policia ka ndërhyrë më pas duke arrestuar dy prej autorëve dhe duke shpallur në kërkim të tretin. Në pranga kanë rënë Hysen Neza, 33 vjeç dhe Kevin Neza, 25 vjeç, ndërsa 28-vjeçari Jurgen Neza është në kërkim.
Të tre janë të afërm mes tyre dhe njihen nga policia për precedentë penalë, kryesisht për vjedhje dhe përfshirje në konflikte të ndryshme. Sipas të dhënave, ata njihen edhe si përdorues të lëndëve narkotike.
Viktima është një biznesmen nga Divjaka me inicialet F. Sula, i cili ushtron aktivitet në fushën e ndërtimit dhe ishte kthyer nga jashtë rreth dy muaj para ngjarjes. Sipas informacioneve hetimore, ai kishte qenë nën vëzhgim nga autorët për një periudhë kohe, të cilët kishin ndjekur lëvizjet e tij dhe kishin përgatitur planin e rrëmbimit.
Si ndodhi ngjarja
Ngjarja ka ndodhur në zonën pranë ish-Parkut në Tiranë. Në momentin kur 32-vjeçari është larguar nga një lokal dhe ka hyrë në një rrugicë, tre personat i janë afruar. Ata kanë qenë të maskuar, njëri me kapele dhe syze, ndërsa dy të tjerët me maska farmacie dhe syze. Autorët janë prezantuar si agjentë të Byrosë Kombëtare të Hetimit dhe, duke përdorur këtë identitet të rremë, e kanë detyruar të hipte në automjet.
Fillimisht, ata i kanë kërkuar shumën prej 2 milionë eurosh. Pas refuzimit nga ana e ndërtuesit, autorët kanë ushtruar dhunë fizike dhe më pas kanë ulur kërkesën në 1 milion euro. Edhe kjo shumë është kundërshtuar, me pretendimin se ai nuk dispononte para të tilla. Nën presion, kërkesa është reduktuar në 500 mijë euro.
Pas mbajtjes gjatë natës në një magazinë në zonën e Xhafzotajt në Durrës, ku është dhunuar, 32-vjeçari është liruar në mëngjes me kushtin që të siguronte shumën e kërkuar. Menjëherë pas lirimit, ai është paraqitur në polici dhe ka kallëzuar ngjarjen, duke dhënë detaje që çuan në identifikimin e autorëve.
Sipas hetimeve, identifikimi është bërë përmes kamerave të sigurisë në itinerarin e ndjekur nga autorët, të cilët gjatë gjithë kohës kanë qenë të veshur me rroba të zeza dhe të maskuar.
Burimet tregojnë se autorët kishin marrë informacion nga persona ende të paidentifikuar, të cilët dyshohet se u kishin dhënë të dhëna për gjendjen financiare të ndërtuesit dhe mundësinë që ai të mbante shuma të konsiderueshme parash.
