Hapja e Shkollës Kombëtare të Fluturimit/ Rama: "Black Hawk” nga SHBA do t’i shtohet këtyre forcave

Kryeministri Edi Rama njoftoi se Forcat e Armatosura të Shqipërisë po hyjnë në një fazë të re transformimi, me fokus shtimin e kapaciteteve ajrore. Gjatë ceremonisë së hapjes së Shkollës Kombëtare të Fluturimit, Rama konfirmoi rritjen e flotës së helikopterëve si "Black Hawk", si dhe krijimin e institucinove të reja të edukimit.

Përveç Shkollës së Fluturimit, Rama u shpreh se, qeveria ka planifikuar hapjen e Shkollës Kombëtare të Forcave Speciale, një institucion që synohet të shërbejë si qendër ekselence dhe të mirëpresë vendet aleate.

"Jemi gati edhe për të përballuar sfidën e përvitshme ku beteja me zjarrin është e pashmangshme. Po punohet për t’i shtuar kapacitetet për sezonin. Një numër tjetër “Black Hawk” nga SHBA do t’i shtohet këtyre forcave. Ky është njëri hap. Hap tjetër është shkolla kombëtare e forcave speciale. Do të mirëpresë kadetë nga vendet aleate.

Të dyja këto pole të reja të edukimit dhe transformimit të kthehen në pole ekselence. Dua t’i uroj sukses forcës ajrore. I siguroj forcat detare se buzëqeshja e tyre do shtrihen më tutje, me ndërtimin e anijeve në Pashaliman. Do hapim dyert e një tjetër investimi të përbashkët me KAYO për dronet që do të ndërtohen dhe do eksportohen nga Republika e Shqipërisë, pasi të kemi plotësuar nevojat e FA”, u shpreh Rama.