Hetimet ndaj Ballukut, merret në pyetje nga SPAK biznesmeni Alban Eftimi

Alban Eftimi, biznesmeni i kompanisë “Atelier 4”, është paraqitur këtë të enjte në ambientet e Prokurorisë së Posaçme, ku ka dhënë dëshminë e tij në kuadër të hetimeve që lidhen me ish-zëvendëskryeministren Belinda Balluku. Lajmi konfirmohet për BalkanWeb nga gazetarja KLodiana Lala.

Paraqitja e Eftimit në SPAK vjen pas kontrolleve të kryera në fund të muajit korrik në ambientet e kompanisë “Atelier 4”. Gjatë këtij operacioni, hetuesit e posaçëm kanë sekuestruar dokumente dhe materiale që dyshohet se kanë lidhje me një projekt arredimi të një vile luksoze në jug të Shqipërisë. Materialet e marra gjatë kontrollit po shqyrtohen nga prokurorët dhe po ballafaqohen me të dhëna e prova të tjera të mbledhura gjatë hetimit.

Në qendër të verifikimeve ndodhet një vilë në Dhërmi, e cila është sekuestruar më herët nga autoritetet. Dyshimet e ngritura nga hetuesit lidhen me mundësinë që prona të jetë pasuri e padeklaruar dhe të ketë lidhje me Belinda Ballukun.