Irani ka publikuar një video të rrallë dhe pa datë të liderit suprem Mojtaba Khamenei, në atë që duket të jet&eum...
AKTUALITET
Hodhi gruan me makinë në det, 45-vjeçari shqiptar ‘fajëson’ shapkën! Çfarë tha para gjykatës
PiranjatPërditësimi i fundit 25 Gusht 2026, 18:20
Shqiptari 45-vjeçar Ismail Picari, banues në San Giovanni in Marignano, në zonën e Riminit, është lënë në burg, pasi akuzohet për tentativë vrasjeje ndaj bashkëshortes së tij.
Ngjarja ndodhi më 19 gusht në portin e Cattolicës. Burri pretendoi se bëhej fjalë për një aksident, duke deklaruar se shapka i ishte ngecur te pedali i gazit. Megjithatë, hetimet e autoriteteve italiane kanë ngritur dyshime se ai e kishte drejtuar qëllimisht automjetin drejt detit.
Sipas rindërtimit të bërë nga karabinierët, 45-vjeçari i kishte propozuar gruas të dilnin me makinë, me pretekstin se do të shkonin për të bërë pazar. Pasi mbërritën në zonën e portit, ai dyshohet se rriti shpejtësinë dhe e drejtoi automjetin qëllimisht drejt detit.
Makina goditi një shtyllë dhe përfundoi në ujë, duke u ndalur në një thellësi prej rreth tre metrash.
Burri arriti të dilte i pari nga automjeti, ndërsa bashkëshortja e tij, e cila nuk di të notojë, u detyrua të dilte përmes xhamit të pasmë. Për fat të mirë, dy kalimtarë që u hodhën në det arritën ta shpëtonin me ndihmën e një litari.
Gruaja u transportua më pas në spitalin e Pesaro-s për kontrolle mjekësore, ku u tregoi karabinierëve versionin e saj të ngjarjes. Ndërkohë, 45-vjeçari ishte larguar nga vendi i ngjarjes dhe ishte fshehur. Pas disa orësh kërkimesh, ai u gjet nga karabinierët pranë një zone pyjore, jo shumë larg banesës së tij. Arrestimi u krye më 20 gusht.
Gjykatësi i hetimeve paraprake (GIP) i Riminit vlerësoi se nga hetimet kishte dalë një rrezik konkret i përsëritjes së veprës penale dhe vendosi masën e paraburgimit në burg.
Në vendimin e gjykatës ndikoi edhe një incident i mëparshëm, i ndodhur vetëm disa ditë para ngjarjes në port. Karabinierët kishin ndërhyrë në banesën e çiftit pas një konflikti. Sipas autoriteteve, 45-vjeçari kishte reaguar në mënyrë të dhunshme dhe kërcënuese ndaj efektivëve, duke kundërshtuar me forcë arrestimin, duke plagosur lehtë dy karabinierë dhe duke dëmtuar një automjet të shërbimit.
Në atë rast ai ishte arrestuar për rezistencë ndaj një zyrtari publik. Arrestimi ishte konfirmuar nga Gjykata e Riminit, e cila pas gjykimit të menjëhershëm kishte vendosur ndaj tij detyrimin për t’u paraqitur pranë policisë gjyqësore.
Pas arrestimit të ri për tentativë vrasjeje, 45-vjeçari do të qëndrojë në burg në pritje të zhvillimit të mëtejshëm të çështjes. /PiranjatNews/
