Humbi kontrollin e mjetit në Fushë Arrëz–Bajram Curri, ndërron jetë në spital shoferi

Ka ndërruar jetë në Spitalin e Traumës në Tiranë Aleks Uka, i cili mbeti i plagosur rëndë në aksidentin e ndodhur në segmentin rrugor Fushë Arrëz–Bajram Curri, në fshatin Porav.

Fillimisht u raportua se aksidenti kishte ndodhur pas një përplasjeje mes një fuoristrade dhe motorit që drejtonte Uka, por verifikimet e kryera në vendngjarje kanë zbardhur një tjetër dinamikë.

Sipas hetimeve paraprake, Aleks Uka ka humbur kontrollin e automjetit dhe është përplasur me murin anësor të rrugës. Fuoristrada e ndodhur pranë vendit të ngjarjes nuk ka qenë pjesë e aksidentit, por është ndalur për t’i dhënë ndihmë të plagosurit.

Pas përplasjes, Uka u transportua fillimisht në spitalin e Bajram Currit dhe më pas u dërgua me helikopter drejt Tiranës për trajtim të specializuar. Pavarësisht ndërhyrjes së mjekëve, ai nuk ka mundur t’u mbijetojë plagëve të marra.