16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
I dashuri i vrau të bijën, flet nëna e vajzës shqiptare: Nuk shprehu asnjë emocion! Dënimi i pamjaftueshëm
PiranjatPërditësimi i fundit 11 September 2026, 18:25
“Nuk është një dënim i përshtatshëm, sepse nuk janë marrë parasysh shumë gjëra”.
Me një zë të vendosur, por të shënjuar nga dhimbja, Morena Corbellini, nëna e Aurora Tilas, 13-vjeçares që u hodh nga ballkoni më 25 tetor 2024 në Piacenza, reagoi në emisionin “Ore 11” lidhur me vendimin e Gjykatës së Apelit të Bolonjës për të ulur nga 17 në 15 vjet dënimin ndaj ish-të dashurit të saj, i cili ka pranuar autorësinë e krimit.
Corbellini renditi ato që, sipas saj, nuk janë marrë në konsideratë në mënyrë të duhur, duke nisur nga paramendimi, i cili, sipas saj, del qartë nga aktet e çështjes, deri te sjellja e të riut menjëherë pas krimit.
“Fillimisht e mohoi, më pas pranoi vrasjen pa treguar asnjë emocion”, theksoi ajo. “Ndërsa dje, çuditërisht, në sallën e gjyqit qau”.
Një detaj që nëna e viktimës e sheh si një kontradiktë dhe që shton hidhërimin e saj për faktin se nuk iu dha mundësia të dëshmonte gjatë procesit gjyqësor.
“Besoj se është thelbësore t’u jepet zë atyre që nuk kanë zë, viktimave që mbeten pas”, u shpreh ajo, duke kujtuar se prej vitesh familjet kërkojnë që palës civile t’i kushtohet më shumë vëmendje, pasi shpesh, sipas saj, “nuk merret në konsideratë dhe nuk mbrohet”.
Një mungesë që, sipas saj, ka dëmtuar thellësisht besimin e saj te sistemi i drejtësisë italiane. Kërkesa e saj përfundimtare iu drejtua drejtpërdrejt institucioneve: “I kërkoj qeverisë të ndryshojë ligjet dhe t’i bëjë ato më të ashpra”.
Corbellini ka frikë se dënime të tilla të reduktuara mund të përcjellin një mesazh të rrezikshëm. “Me dënime kaq të lehta, kush e di sa persona mund të ndihen të autorizuar të bëjnë atë që iu bë vajzës sime”, përfundoi ajo. /PiranjatNews/
