Atentati në Pogradec/ Arrestohet bashkëpunëtori që vuri kamera për të vëzhguar shënjestrën, arrestohet edhe i plagosuri Brian Syzo

Detaje të reja kanë dalë në dritë nga hetimet për atentatin e dështuar të 30 qershorit në Pogradec, ku mbeti i plagosur rëndë shtetasi Brian Syzo. Policia e Korçës ka vënë në pranga dy persona të përfshirë në këtë histori, mes të cilëve vëllain e autorit të dyshuar si dhe vetë shënjestrën e atentatit.

Burime pranë grupit hetimor bëjnë me dije se strukturat e hetimit të krimit në DVP Korçë kanë arrestuar 22-vjeçarin Edison Agolli. Ai ishte shpallur në kërkim që prej ditës së ngjarjes, pasi akuzohet se ka qenë i pranishëm dhe ka bashkëpunuar me vëllain e tij dhe dy persona të tjerë në tentativën për të vrarë me armë zjarri Brian Syzon.

Mbi 22-vjeçarin rëndon akuza e rëndë “Vrasje me paramendim e kryer për interes, hakmarrje, e mbetur në tentativë, kryer në bashkëpunim”.

Përveç pjesëmarrjes në atentatin e Pogradecit, arrestimi i Agollit lidhet edhe me një tjetër detaj të frikshëm: ai dyshohet se kishte vendosur një kamerë sigurie në afërsi të IEVP Drenovë (burgu i Drenovës) me qëllim që të vëzhgonte dhe të kontrollonte të gjitha lëvizjet e shënjestrës, Brian Syzo.

Nga ana tjetër, pas hekurave ka përfunduar edhe vetë shënjestra e këtij atentati, Brian Syzo, 35 vjeç, i cili mbeti i plagosur rëndë në ngjarjen e 30 qershorit.

Arrestimi i tij është bërë pasi Gjykata e Apelit ka lënë në fuqi vendimin e Gjykatës së Pogradecit të vitit 2023. Syzo është dënuar përfundimisht me 3 vite e 4 muaj burg për veprën penale “Prodhim dhe shitje e lëndëve narkotike”, dënim të cilin tashmë duhet ta vuajë në qeli.