I riu shqiptar ngre dyshime te policia, para prangave përfundon në spital pas asaj që u deklaroi efektivëve

Në kuadër të kontrolleve të territorit, Policia italiane në Spoleto arrestoi një të ri 21-vjeçar shqiptar, i cili u kap me 17.5 gramë kokainë. 

I riu, i cili kishte mbërritur në qytetin italian me vizë turistike, u ndalua nga policia përgjatë rrugës shtetërore Flaminia. Ai shfaqi menjëherë një gjendje të fortë nervozizmi, çka i shtyu efektivët të kryenin një kontroll të detajuar të automjetit.

Gjatë kontrollit personal dhe të makinës, policia gjeti 34 doza kokaine të fshehura pas baterisë së automjetit, si dhe 490 euro cash, të cilat dyshohet se ishin përfitim nga aktiviteti i shpërndarjes së drogës.

Gjithashtu, i riu deklaroi se kishte gëlltitur disa mbështjellëse me kokainë, gjë që bëri që policia të thërriste urgjencën. Ai u dërgua në urgjencën e spitalit të Spoleto-s, por ekzaminimet mjekësore nuk konfirmuan praninë e tyre.

Pas përfundimit të procedurave, 21-vjeçari u arrestua për posedim të lëndëve narkotike me qëllim shpërndarjeje dhe fillimisht u mbajt në arrest shtëpie në spital. Më pas, me urdhër të prokurorit të gatshëm, ai u transferua në burg.

Gjykatësi i Gjykatës së Spoleto-s konfirmoi arrestimin dhe vendosi vazhdimin e qëndrimit të tij në burg. /PiranjatNews/