Në ceremoninë përkujtimore të 80-vjetorit të Kryengritjes së Postribës, deputeti i PD-së, Bardh Spahia, vlerësoi ...
AKTUALITET
Incidenti në dhomat e izolimit në Sarandë/ Detaje të reja: I arrestuari përdorues i lëndëve narkotike, ndërhyjnë edhe të ndaluarit e tjerë për ta qetësuar
PiranjatPërditësimi i fundit 9 Shtator 2026, 21:01
Një incident i ndodhur gjatë orëve të para të mëngjesit në dhomat e izolimit të Komisariatit të Policisë së Sarandës ka shkaktuar tension mes efektivëve dhe personave të ndaluar.
Ngjarja ndodhi rreth orës 01:30, kur një 22-vjeçar i arrestuar, me inicialet D. S., shfaqi sjellje agresive dhe kundërshtoi efektivët e policisë. Situata u përshkallëzua brenda ambienteve të izolimit, ku i riu përplasi disa karrige dhe sende që ndodheshin aty.
Për disa momente situata doli jashtë kontrollit, ndërsa në qetësimin e 22-vjeçarit ndërhynë edhe të ndaluarit e tjerë që ndodheshin në dhomat e izolimit. Më pas, me ndërhyrjen e policisë, situata u vu nën kontroll.
Pas incidentit, 22-vjeçari është marrë me ambulancë dhe i është dhënë trajtimi i nevojshëm qetësues.
Ndryshe nga versioni i raportuar më herët, ku pretendohej se të ndaluarit kishin qëndruar 24 orë pa ushqim dhe se kishin marrë çelësat e efektivëve duke kërkuar bukë, një tjetër version i ngjarjes del nga të dhënat e siguruara nga Piranjat News.
Sipas burimeve brenda Komisariatit të Sarandës, agresiviteti i të riut lidhet me gjendjen e tij, pasi ai njihet si përdorues dhe trafikues i lëndëve narkotike dhe dyshohet se kishte nevojë për konsum. Në këtë gjendje, ai ka nisur të përplaste karrige dhe sende të tjera, duke shkaktuar tension në ambientet e izolimit.
D. S. është me banim në Tiranë, por qëndronte me qira në Sarandë gjatë sezonit veror. Ai u arrestua në kuadër të operacionit të koduar “Vjeshta” dhe rezulton të jetë arrestuar edhe dy herë të tjera në Tiranë.
Gjatë kontrollit në banesën me qira ku qëndronte në Sarandë, policia i gjeti dhe i sekuestroi një armë zjarri, pistoletë me mulli.
