Kim Kardashian ka rrëfyer se kishte dyshime përpara martesës me ish-basketbollistin e NBA-së, Kris Humphries, por vendosi të vaz...
AKTUALITET
Integrimi/ Shoqëria Civile: Të mbështetet nga transparenca, shqyrtimi parlamentar, konsultimi publik
PiranjatPërditësimi i fundit 3 June 2026, 16:47
Shoqëria Civile i ka bërë thirrje qeverisë shqiptare të bëjnë transparencë, lidhur me procesin e integrimit evropian të vendit. Në një deklaratë të përbashkët, organizatat e shoqërisë civile kërkuan që ndryshimet në Rregulloren e Kuvendit të mos e shndërronin procesin e integrimit europian në një procedurë të përshpejtuar pa garanci të mjaftueshme për shqyrtim parlamentar, transparencë dhe konsultim publik.
Sipas deklaratës,vlerësimi nuk lidhet thjesht me miratimin e ligjeve, por me krijimin e një historiku të qëndrueshëm dhe të monitorueshëm të reformave, duke përfshirë edhe të zbatimit, transparencës, konsultimit dhe mbikëqyrjes parlamentare. Ndër të tjera, deklarata shton se pozicioni i Bashkimit Europian për piketat përmbyllëse e lidh qartë përparimin në këtë grup-kapitull me funksionimin efektiv të Kuvendit, mbikëqyrjen e ekzekutivit, ndërveprimin me shoqërinë civile dhe një proces të plotë të përafrimit me acquis, me kohë të mjaftueshme për konsultim thelbësor dhe dialog gjithëpërfshirës me aktorët e interesuar.
Cilësia e ligjbërjes, thuhet më tej, është standard demokratik në vetvete, ajo lidhet me sigurinë juridike, kontrollin parlamentar, pjesëmarrjen e qytetarëve dhe zbatueshmërinë e ligjeve në praktikë.
Për këtë qëllim, shoqatat i kërkojnë Kuvendit që, në bashkëpunim me institucionet propozuese dhe në kuadër të rolit të tij ligjvënës dhe mbikëqyrës, të garantojë këto standarde në procesin e ligjbërjes së integrimit europian:
1. Arsyetim publik për përdorimin e procedurës së përshpejtuar
2. Dokumentacion i plotë përpara shqyrtimit në komision
3. Konsultim dhe shqyrtim real për ligjet me ndikim të lartë
4. Procedurë e zakonshme për projektligje komplekse ose me ndikim të gjerë
5. Mbikëqyrje parlamentare mbi zbatimin e legjislacionit të integrimit europian
6. Gjurmueshmëri publike e procedurës së përshpejtuar
Kuvendi i Shqipërisë duhet të garantojë që ritmi i procesit të integrimit europian të mbështetet nga transparenca, shqyrtimi parlamentar, konsultimi publik dhe vullneti institucional për ligjbërje cilësore, në mënyrë që përafrimi me acquis të mos mbetet formal, por të prodhojë ligje të qarta, të zbatueshme dhe të kuptueshme për qytetarët, institucionet dhe aktorët e prekur si dhe reforma të qëndrueshme.
