Detaje të reja dalin në dritë lidhur me incidentin e rëndë me armë zjarri të regjistruar mesditën e kësaj të...
AKTUALITET
Investitori strategjik (GJIKURIA) fiton tenderin 2 milionë euro për të ndërtuar rrugën e kompleksit të tij në Palasë!
PiranjatPërditësimi i fundit 15 Gusht 2026, 22:23
Një investitor strategjik ka arritur të fitojë një tender të majmë për të ndërtuar rrugë, jo për fshatra apo qendra të banuara, por për aksin që do të lidhë komplekset e tij që po ndërton me rrugën automobilistike. Kompania Gjikuria po vepron prej shumë vitesh në zonën e Himarës, përkatësisht në Palasë dhe Gjilekë, ku është shpallur dy herë investitore strategjike, ndërkohë që po në atë vend ka fituar tendera për Ujësjellësa apo për rrugë të tjera, një qark i mbyllur i cili duket se është shumë i dyshimtë.
Interesat e Gjikurisë në atë vend janë të mëdha, por vendimmarrja e pushtetit qendror dhe lokal lë shumë për të dëshiruar, duke qenë se vetë shteti i fali njëherë tokën publike, më pas i fali taksat për 10 vite, i ndërtoi të gjithë punët publike e tani i jep tendera. Dokumentet që ka hulumtuar redaksia e Vox News tregojnë një qark të mbyllur të firmës Gjikuria në atë zonë, e cila ka disa kantiere, pasi me paratë e taksave të himariotëve të varfër po ndërton një rrugë private për pronat.
Faksimile: Njoftimi i fituesit të tenderit për rrugën në zonën e Gjilekës, Himarë, për komplekset turistike
Sipas dokumenteve që ka hulumtuar Vox News, në datën 10 gusht 2026, Bashkia e Himarës ka shpallur fituesin e tenderit me objekt “rikonstruksioni i rrugës lidhëse të impiantit Gjilekë me rrugën nacionale”. Fondi limit i kësaj procedure ka qenë 208 milionë lekë, vënë në dispozicion nga buxheti i Bashkisë Himarë, i ndarë në dy vite financimi.
Në vitin 2026 do të shpenzohen 83 milionë lekë dhe në vitin 2027 do shpenzohen 125 milionë lekë, teksa afati i punimeve është brenda 18 muajve. Në tender morën pjesë disa kompani, ku firma “Be Is” ofroi 184 milionë lekë, “Fusha” ofroi 198 milionë lekë dhe kompania “Gjikuria” ofroi 184 milionë lekë, ose rreth 2 milionë euro.
Tenderin e ka finalizuar Sekretari i Përgjithshëm i Bashkisë së Himarës, Pervin Gjikuria. Në dokumentet shoqëruese, të hulumtuara nga Vox News, bëhet me dije se Bashkia e Himarës ka një sipërfaqe prej 571.94 km² dhe 7,818 banorë. “Aksi rrugor që kërkohet të ndërtohet, nis pranë rruges se re ekzistuese ‘Palasë –
Dhërmi’, e cila zbret poshtë (në krah të përroit) deri në afërsi të Impiantit të Trajtimit të Ujërave të Palasës. Gjurma ku parashikohet të kalojë segmenti rrugor, paraqitet në gjendje natyrore dhe ka një gjatësi totale rreth 1000 m” thuhet në dokumente.
Në foto: Gjurma e rrugës që do të ndërtohet, pranë dise komplekseve të banimit
Në të njëjta dokumente shkruhet se ndërhyrjet e parashikuara synojnë të krijojë një infrastrukturë komode për lëvizjen e automjeteve në zonën ku shtrihet objekti dhe të krijojë një infrastrukturë bashkëkohore për lëvizjen dhe sigurinë e këmbësorëve. Bashkia e Himarës ka paraqitur edhe një hartë se ku do të kalojë rruga, e cila është ngjitur me Përroin dhe u shërben komplekseve turistike që po ndërtohen, disa prej të cilëve nga vetë firma Gjikuria.
“Zona në të cilën do të shtrihet projekti është rreth 1000 ml. Segmenti rrugor që do të ndërtohet shtrihet pothuajse në të gjithë gjatësinë e tij në gjurmë të re, pjesa me e madhe e së cilës në krah të përroit. Relievi është kodrinor ku bimësia është e pranishme edhe në formën e pemëve të larta. Zona përreth është një zonë me ritme të larta zhvillimi turistik por edhe residencial në formën e komplekseve të mëdha të Banimit” thuhet në dokumente.
Në foto: Gjendja e vendit ku do të ndërtohet rruga në Gjilekë
Sipas projektit, duke qenë se rruga kalon në gjurmë të re, nuk ekziston një rrjet ekzistues. “Të nisur nga sa më sipër gjatë hartimit të projekt-zbatimit do ishte e nevojshme që ndërhyrjet në realizimin e një rrjeti të ri KUSH, i cili do të marri në konsideratë perspektivën e zhvillimit të rruges dhe zonës, drejtimin e zhvillimit urbanistik të zonës” thuhet në dokumente.
Krahas rrugës, Bashkia e Himarës do të ndërtojë edhe kanalet e ujërave të zeza, një rrjet ujësjellës apo edhe vendosjen e linjave të reja të hidrantëve zjarrfikës, referuar normave të miratuara në fuqi dhe rregullores së PMNZSH-së. Madje të ketë rrethrrotullime apo edhe ndriçimin e gjelbërimin.
Në fillim të vitit 2024, Agjencia Kombëtare e Ujësjellës – Kanalizimeve shpalli fituesin e tenderit me objekt “furnizimi me ujë të zonave bregdetare, Zonat e Investimit Strategjik Draleos, Drimadhes dhe Dhërmi, Faza e Parë”. Kompania “Gjikuria” ofroi 679 milionë lekë, ofertë e cila u shpall edhe fituese, megjithëse s’ishte më e ulta.
Faksimile: AIDA në vitin 2021 dhe 2023 shpalli firmën “Gjikuria” Investitor Strategjik në Palasë
Vetë shteti shqiptar e ka shpallur në dy raste firmën “Gjikuria” si Investitor Strategjik. Fillimisht me vendimin me numër 10\8 “për projektin e investimit me potencial strategjik “Coast to Coast”, që mori mbështetje edhe nga AZHBR-ja. “Projekti parashikon ndërtimin e një investimi kompleks të përbërë nga 3 hotele dhe vila rezidenciale me sipërfaqe truall 20.9 ha në zonën kadastrale 1739, në Himarë” thuhet në këtë dokument.
Ndërkohë, në një vendim tjetër me numër 34\11 të datës 1 gusht 2023, AIDA ka vendosur ta shpallë sërish investitor strategjik për “projektin e investimit ‘Ëhite Roads Hotel’”. Në të dyja rastet, firma “Gjikuria” ka marrë mijëra metra katrorë truall shtetëror, buzë detit Jon për vetëm 1 euro.
