Ish-prokurori Beçi: Është cënuar piramida e sigurisë së shtetit, kur themi Vlora, themi SHISH

Ish-kryeprokurori i Krimeve të Rënda, Eugen Beçi ka folur lidhur me masën e sigurisë ndaj drejtoreshës së SHISH, Vlora Hyseni. Sipas tij, arrestimi i saj ka cenuar sigurinë dhe besueshmërinë e institucionit.

“Është e paprecedentë kur një kreu të Shërbimit i caktohet masë sigurimi. Do të thotë që zullumi ka vajtur atje ku nuk mban më. Nuk ka lidhje me personin, sepse nuk e ndan dot institucionin nga personi, pasi e dimë shumë mirë se si funksionon piramida e shërbimit. Drejtuesi i Shërbimit duhet të ketë dijeni për gjithçka.

Ai ka informacionet më të rëndësishme të shtetit.

Pika e dytë, cenohet piramida e shtetit. Pavarësisht se nuk e ndajmë dot, kur themi Vlora themi SHISH dhe është e pamundur ta ndajmë. Është cenuar në mënyrë të drejtpërdrejtë shteti.

Nuk cenohet për faj të Prokurorisë, por për faj të vetë SHISH-it besueshmëria e institucionit”, tha Beci.