ISHMT bllokon 600 gota qelqi që u futën në Shqipëri, origjina nga Kina, rrezik serioz për shëndetin

Një sasi prej 600 copë gotash qelqi, u ndalua para hedhjes së tyre në treg për përdorim nga konsumatorët, falë ndërhyrjes së shpejtë të ISHMT, në bashkëpunim me AKU dhe subjektin tregtar që kishte bërë importin e tyre në Shqipëri.

Inspektorati Shtetëror i Mbikëqyrjes së Tregut njofton se ka bërë bllokimin e produkteve me të dhënat si më poshtë:

• Gota qelqi për pije me print kungulli (nr. artikulli 3057450)

• Gota qelqi për pije me motiv “Holly” në ngjyrë jeshile dhe të kuqe (nr. artikulli 3058966)

• Gota qelqi për pije me print lulesh (nr. artikulli 3065910)

• Gota qelqi për pije me zemra të vogla të kuqe (nr. artikulli 3068486)

Produktet u identifikuan pas njoftimit nga prodhuesi Zebra A/S dhe përmes sistemit RASFF, si një Alert me temë: “Prania e metaleve të rënda (kadmium dhe plumb) në gota qelqi me origjinë nga Kina, të shpërndara përmes Danimarkës.”

ISHMT vijon monitorimin e tregut për të garantuar sigurinë e produkteve dhe mbrojtjen e interesave të konsumatorëve, ndërsa për këtë rast bën me dije se shteti që kishte njoftuar për gotat e qelqit ka qenë Sllovakia dhe niveli i rrezikut është konsideruar Serioz.