Iu vendos masa e sigurisë "arrest shtëpie"/ Zbulohet vendndodhja e drejtoreshës së SHISH

Drejtoresha e Shërbimit Informativ të Shtetit, Vlora Hyseni, është vendosur nën masën e sigurisë “arrest në shtëpi” me kërkesë të SPAK dhe vendim të GJKKO-së. Gjykata ka vendosur gjithashtu pezullimin e saj nga detyra.

Masa e sigurisë nuk është ekzekutuar gjatë kontrolleve të zhvilluara mëngjesin e kësaj të marte, pasi drejtoresha e SHISH nuk ndodhej në banesën e saj.

Sipas të dhënave të bëra publike, Vlora Hyseni ndodhet jashtë vendit, në Azerbajxhan, ku merr pjesë në një konferencë për sigurinë. Në aktivitet marrin pjesë drejtues të shërbimeve informative nga vende të ndryshme të botës. Për pasojë, urdhri për “arrest në shtëpi” mbetet ende pa u ekzekutuar, ndërsa pritet që autoritetet të përcaktojnë hapat e mëtejshëm për zbatimin e vendimit të gjykatës.

Masa ndaj kreut të SHISH përbën një zhvillim të rëndësishëm në hetimet e SPAK, të cilat janë shtrirë edhe te zyrtarë dhe persona të tjerë. Për Hysenin, ashtu si për çdo person nën hetim, vlen prezumimi i pafajësisë deri në një vendim gjyqësor të formës së prerë.

Hyseni dyshohet për disa vepra penale, mes tyre “Përkrahja e autorit të krimit”, “Nxjerrja e sekretit shtetëror” dhe “Shpërdorimi i detyrës”.