Kapen mbi 55 kg marijuanë në kufirin greko-shqiptar, arrestohet 68-vjeçari shqiptar

Një 68-vjeçar shqiptar është arrestuar në Follorinë të Greqisë, pasi u kap duke transportuar një sasi të madhe lënde narkotike. Sipas autoriteteve greke, operacioni u zhvillua nga oficerët e Departamentit të Hetimit dhe Ndjekjes Penale të Krimeve në Follorinë, pas sigurimit të informacioneve për trafik droge.

Gjatë kontrollit të automjetit që drejtohej nga 68-vjeçari, policia gjeti dy çanta udhëtimi dhe një thes me 50 pako me marijuanë, me peshë totale 55 kilogramë e 422 gramë. Gjithashtu, u sekuestruan edhe tre telefona celularë.

Sipas të dhënave të publikuara nga autoritetet greke, muajt e fundit është evidentuar një rritje e rasteve të trafikut të marijuanës nga Shqipëria drejt Greqisë. Në 11 muajt e fundit, në zonat e Igumenicës, Janinës, Kosturit, Follorinës dhe Selanikut janë sekuestruar mbi 1.2 ton marijuanë.

Një pjesë e konsiderueshme e rasteve lidhet me linjën Sarandë–Igumenicë, ku autoritetet kanë goditur disa tentativa trafikimi, përfshirë edhe një rast ku u sekuestrua një skaf i ngarkuar me lëndë narkotike.