Hetuesit e ngjarjes së ndodhur në stacionin e karburantit “EIDA” në zonën e Brrylit në Tiranë nuk kanë ende nj&...
AKTUALITET
Kapet me 500 mijë euro drogë në kamion, arrestohet shqiptar në kufirin bullgar
PiranjatPërditësimi i fundit 8 Qershor 2026, 12:05
Një shtetas shqiptar është arrestuar nga autoritetet bullgare pasi u kap duke transportuar një sasi të konsiderueshme marihuane me vlerë rreth 500 mijë euro në pikën kufitare të Gueshevos, në hyrje të Bullgarisë nga Maqedonia e Veriut.
Sipas mediave të huaja, ngjarja u regjistrua më 6 qershor, kur një kamion me targa shqiptare u përzgjodh për një kontroll të detajuar doganor. Gjatë inspektimit, oficerët zbuluan gjashtë qese të mbushura me një substancë bimore të gjelbër, e cila ishte fshehur në një ndarje të ndërtuar posaçërisht brenda kabinës së automjetit.
Testet e kryera në vendngjarje konfirmuan se bëhej fjalë për marihuanë. Sasia totale e drogës së sekuestruar rezultoi 60.920 kilogramë, ndërsa vlera e saj në treg llogaritet në rreth 498.366 euro.
Pas zbulimit të ngarkesës së paligjshme, shoferi 28-vjeçar shqiptar tentoi të largohej nga zona e kontrollit, por u ndalua pak minuta më vonë nga efektivët e Policisë Kufitare bullgare.
Me urdhër të Zyrës së Prokurorit të Qarkut Kyustendil, i dyshuari është vendosur në ndalim për 72 orë. Ndërkohë, prokuroria ka nisur procedurat për sigurimin e një mase më të rëndë sigurie, duke kërkuar vazhdimin e paraburgimit të tij deri në përfundimin e hetimeve.
Autoritetet bullgare theksuan se mënyra e sofistikuar e fshehjes së drogës brenda një strukture të modifikuar në kabinën e kamionit tregon për një operacion të organizuar trafikimi. Hetuesit po punojnë për të zbuluar origjinën e lëndës narkotike dhe destinacionin e saj përfundimtar.
