Kërcënimi ndaj gazetares Avi Mema dhe kameramanit, reagon UGSH: Policia dhe Prokuroria të veprojnë menjëherë!

Unioni i Gazetarëve Shqiptarë, ka dënuar kërcënimin ndaj gazetares së “Piranjave”, Avi Mema dhe kameramanit Nertil Mataj nga shtetasja Elena Demollari, e cila u demaskua në media për mashtrimin me “magjitë” që zhvaste njerëzit duke u marrë lekë.

Elena Demollari publikoi në rrjetet sociale imazhe ogurndjellëse ndaj gazetares Avi Mema dhe kameramanit Nertil Mataj.

UGSH u kërkon autoriteteve vendore; si të policisë së shtetit edhe të prokurorisë, të ndërmarrin masa sigurie për kolegët e emisionit investigativ dhe të hetojnë rrethanat e këtij kërcënimi të hapur për shkak të detyrës.

Deklaratë e Unionit të Gazetarëve Shqiptarë:

Denoncojmë rastin e kërcënimit të reporteres dhe operatorit të emisionit “ Piranjat”

Tiranë më 3 Mars 2026

Unioni i Gazetarëve Shqiptarë denoncon sjelljen dhe fjalët kërcënuese si dhe simbolikën ogurndjellëse të publikuar nga shtetasja Elena Demollari ndaj gazetares dhe operatorit të emisionit “Piranjat”, për arsye të një investigimi të realizuar rreth rasteve të dyshuara për mashtrim. Në aktin kërcënues prej kësaj shtetaseje, përfshihet qarkullimi në rrjetet sociale i imazheve ogurndjellëse ndaj gazetares Avi Mema dhe kameramanit Nertil Mataj.

Ky publikim, i bashkëshoqëruar me mesazhe kërcënuese dhe stigmatizuese, përbën një kërcënim të hapur për integritetin fizik dhe psikologjik të kolegëve.

Ky rast shpreh agresivitetin reagues dhe kulturën kërcënuese që demonstrohet ndaj reporterëve, sidomos atyre investigues, prej personave që ballafaqohen me fakte dhe denoncime që dëshmojnë veprime antiligjore.

UGSH u kërkon autoriteteve vendore; si të policisë së shtetit edhe të prokurorisë, të ndërmarrin masa sigurie për kolegët e emisionit investigativ dhe të hetojnë rrethanat e këtij kërcënimi të hapur për shkak të detyrës.

UGSH shpreh solidaritetin e plotë me kolegët e “Piranjave” si dhe inkurajon çdokënd prej anëtarëve të komunitetit tonë profesional, për të qenë në lartësinë e raportimit kurajoz dhe drejtinformues.

Zyra e Informimit.