Laborator kokaine në godinën e braktisur/ 21-vjeçari shqiptar ngriti vetë dyshimet te policia. Dozat i fshehu në të brendshme

Një operacion i rëndësishëm antidrogë është zhvilluar nga Karabinierët e Njësisë Hetimore pranë Komandës Provinciale të Rietit, ku është arrestuar një 21-vjeçar shqiptar, pa precedent penal, i papunë dhe me qëndrim të rregullt në Itali.

Operacioni nisi pas një hetimi të targetuar, pasi efektivët kishin vërejtur lëvizje të dyshimta dhe të vazhdueshme të të riut pranë një ndërtese të braktisur metalike, e vendosur mes burgut dhe Spitalit Civil të Rietit.

Vëzhgim dhe ndërhyrje policore

Pas hetimeve fillestare, u organizua një shërbim vëzhgimi dhe ndjekjeje për të monitoruar lëvizjet e tij. Në mëngjesin e ndërhyrjes, Karabinierët e kapën në momentin kur po dilte nga godina dhe e ndaluan.

Droga e fshehur në të brendshme

Gjatë kontrollit personal, 21-vjeçarit iu gjetën gjashtë pako me kokainë, me peshë totale rreth 100 gramë, të fshehura në mënyrë të sofistikuar në të brendshmet e tij. Ky zbulim konfirmoi dyshimet e hetuesve.

Laborator droge në godinë

Kontrollet vijuan në ndërtesën e përdorur si bazë operacioni. Brenda saj u gjetën edhe katër pako të tjera me kokainë, me peshë rreth 1 kilogram, të fshehura në një divan. Në ambient ishte ngritur një laborator i mirëfilltë për përgatitjen e dozave, i pajisur me dy peshore precize dhe materiale të ndryshme për paketim.

Sekuestrohen para

Gjatë operacionit u sekuestruan edhe 970 euro cash, që dyshohet se janë përfitim nga aktiviteti i paligjshëm. Sipas hetimeve, sasia e drogës mundësonte prodhimin e mbi 2,500 dozave, me një vlerë tregu rreth 120 mijë euro.

Arrestimi dhe burgosja

Pas përfundimit të procedurave, i riu u arrestua dhe, me urdhër të prokurorit të Rietit, u dërgua në burgun lokal, ku ndodhet në dispozicion të autoriteteve gjyqësore. /PiranjatNews/