EMRAT/ Kontrabandë mallrash nga Greqia, arrestohen 2 persona në Gjirokastër

Dy shtetas janë vënë në pranga në flagrancë, pasi transportonin me autobus mallra të ndryshme të kontrabanduara nga Greqia. Operacioni i koduar “Akciza 3” u finalizua nga specialistët e Seksionit për Hetimin e Krimeve Ekonomiko-Financiare, në bashkëpunim me Agjencinë e Mbikëqyrjes Policore Rajonale Vlorë-Gjirokastër.

Në aksin rrugor “Kakavijë-Gjirokastër”, forcat e policisë ndaluan autobusin që drejtohej me radhë nga dy personat. Gjatë kontrollit u zbuluan të fshehura, në vende të mbyllura, 100 steka me cigare dhe 22 695 euro. Në bagazh u gjetën gjithashtu kuti me produkte deti dhe mishi, produkte bulmeti, kuti me medikamente, 13 thasë me veshje të markave të ndryshme, si dhe mallra të tjera, për të cilat dyshohet se janë kontrabanduar nga Greqia.

Të arrestuarit janë Olcian Lami, 43 vjeç, dhe Markeljan Dida, 43 vjeç, të dy banues në Tiranë. Ata akuzohen për veprat penale “Kontrabanda me mallra të ndaluara ose të kufizuara”, “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Mosdeklarimi në kufi i të hollave dhe i sendeve me vlerë”, “Fshehja e të ardhurave” dhe “Pastrimi i produkteve të veprës penale ose veprimtarisë kriminale”.

Policia sekuestroi 22 695 euro, 100 steka cigare, mallrat e tjera të kontrabanduara, autobusin dhe një aparat celular, të cilat do të shërbejnë si prova materiale.

Hetimet vijojnë për dokumentimin e plotë të rastit dhe identifikimin e personave të tjerë të dyshuar të përfshirë në këtë veprimtari. Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.