50-vjeçari Thimjo Rubati, i plagosur pas një atentati mbrëmjen e së premtes në Sarandë, i transportuar mandej në spitalin...
AKTUALITET
‘Kontroll, kërcënime dhe kirurgji shpërfytyruese’- Rrëfimi i ish-asistentes: Jeta ime brenda ‘kultit’ të Jeffrey Epstein
PiranjatPërditësimi i fundit 18 Korrik 2026, 21:18
Javën pas vdekjes së financierit dhe autorit të krimeve seksuale Jeffrey Epstein, Anya (jo emri i saj i vërtetë) hapi derën e apartamentit të saj në Nju Jork. Jashtë ishte vëllai i Epstein, Mark, i cili i tha se duhej të largohej, rrëfen ajo. Anya kishte jetuar për vite me radhë në një nga disa apartamentet në East 66th Street, në Manhattan, të përdorura nga Jeffrey Epstein për të strehuar gratë që ai abuzonte. Në një çast ajo humbi shtëpinë, por njëkohësisht i shpëtoi një makthi. (Mark Epstein mohon se kishte dijeni për veprimtarinë e paligjshme të vëllait të tij.)
“Ende po përpiqem të pajtohem me faktin se jam abuzuar për vite me radhë”, thotë Anya. “Nuk isha e lidhur me zinxhirë pas një dere apo diçkaje të tillë, apo jo? Nuk isha e mbyllur në një bodrum. Zinxhirët ishin më pak të dukshëm, por ishin aty.”
Epstein, i cili vdiq në vitin 2019 ndërsa priste të përballej me akuza për trafikim seksual të të miturve, e përshkruante organizimin e tij si “një sekt, ku ai ishte udhëheqësi”, thotë Anya. Ajo i ka dhënë BBC-së një rrëfim të rrallë mbi jetën si një nga “asistentet” e Epstein-it, duke treguar se si financieri arriti të mbante nën kontroll kaq shumë nga viktimat e tij për një kohë kaq të gjatë.
“Asistentet” ishin një grup grash – rreth një duzinë në të njëjtën kohë, sipas vlerësimeve të Anyas – të cilat strehoheshin nga Epstein, punonin gjatë gjithë kohës sipas kërkesave të tij dhe abuzoheshin rregullisht seksualisht prej tij.
Anya thotë se ato u joshën me mashtrime të mirëmenduara dhe premtime boshe për punë, përpara se ai të fillonte të ushtronte kontroll shtrëngues mbi pothuajse çdo aspekt të jetës së tyre, duke shfrytëzuar çdo dobësi që arrinte të zbulonte. Ajo tregon se Epstein kontrollonte financat e tyre, diktonte me kë mund të takoheshin dhe i nënshtronte vazhdimisht përmes poshtërimit psikologjik. Sipas saj, ai ishte i fiksuar pas trupave të tyre dhe e detyroi t’i nënshtrohej ndërhyrjeve kirurgjikale të panevojshme dhe shpërfytyruese.
Rrëfimi i saj për mënyrën se si Epstein ushtronte kontroll mbështetet edhe nga Sarah Kellen, një tjetër ish-asistente. Ajo i tha Komitetit të Mbikëqyrjes së Dhomës së Përfaqësuesve të SHBA-së në fillim të këtij viti se Epstein e paraqiste veten si shpëtimtarin e asistenteve. “Ai ishte shumë i aftë të të shkatërronte aftësinë për të marrë vendime dhe për të pasur autonominë tënde. Kjo të bënte gjithnjë e më të varur prej tij”, deklaroi ajo.
Ekziston një paragjykim që i bën njerëzit të mendojnë se vetëm fëmijët janë të ndjeshëm ndaj këtij lloj kontrolli shtrëngues, por “edhe një i rritur mund të manipulohet”, thotë Dr. Tara Quinn-Cirillo, psikologe klinike që ka punuar me viktima të kontrollit shtrëngues. “Edhe të rriturit mund të jenë të cenueshëm ndaj kësaj forme manipulimi”, theksonte ajo.
Janë identifikuar dhe proceduar penalisht dy personat e dyshuar për kanosjen e gazetarit Osman Stafa, i cili denoncoi se u ndoq dhe iu pre rruga me au...
