"Korbat e kishin marrë me vete te Parlamenti"/ Nënë File nxjerr bllof Ramën: Nuk isha në protestë, çova djalin në terapi

Nënë File ka hedhur poshtë deklaratat e kryeministrit Edi Rama lidhur me praninë e saj në protestën para Parlamentit. Ajo bën me dije se nuk kishte shkuar për të protestuar, por ishte duke shoqëruar djalin e saj në terapi, i cili është me spektrin autik.

Duke folur në një intervistë me gazetarin, Osman Stafa, nënë File i ka bërë thirrje kryeministrit Edi Rama që të përballet drejtpërdrejt me të për deklaratat e tij, ndërkohë thotë se djalit i hodhën ujë me piper në protestën para Kuvendit.

“Nuk isha fare në protestë. Po vija nga Kamza, çova çunin në terapi, por rrugët ishin të bllokuara. Kalova nga Parlamenti dhe aty më hodhën piper. I hodhën piper edhe djalit. Isha aty rastësisht”, është shprehur Nënë File.