16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
KPP merr fuqi mbi koncesionet: Mund t’i pezullojë menjëherë ose...
PiranjatPërditësimi i fundit 13 September 2026, 20:55
Kontratat koncesionare dhe partneritetet publik-privat do të kalojnë nën një kontroll më të fortë administrativ, pasi qeveria ka miratuar rregullat që i japin Komisionit të Prokurimit Publik, KPP, kompetencën për të shqyrtuar kërkesat për pavlefshmërinë e kontratave të koncesioneve dhe PPP-ve.
Në kuadër të kësaj, operatorët ekonomikë do të kenë të drejtë të ankimojnë një kontratë brenda gjashtë muajve nga dita pas nënshkrimit të saj. Ndërsa me marrjen e ankesës, KPP mund të vendosë pezullimin e menjëhershëm të zbatimit të kontratës. Kjo deri në marrjen e vendimit përfundimtar.
Përjashtim do të bëhet vetëm kur pezullimi cenon interesa thelbësore të përgjithshme. Por kostot që mund të sjellë vonesa, zhvillimi i një tenderi të ri apo ndryshimi i operatorit nuk konsiderohen arsye për ta mbajtur kontratën në fuqi.
Ajo mund të vendosë edhe shpalljen absolutisht të pavlefshme të kontratës, vetëm në rastet kur KPP konstaton kushtet e parashikuara në ligj.
Gjithashtu për rastet kur kontrata nuk shpallet e pavlefshme, KPP mund të përdorë masa alternative. Kjo duke përfshirë masa si shkurtimi i kohëzgjatjes së koncesionit ose vendosja e një gjobe ndaj autoritetit kontraktor deri në 10% të vlerës së kontratës.
Vendimi i KPP-së mund të ankimohet më pas në gjykatë. Shqipëria ka aktualisht 233 kontrata koncesionare, sipas të dhënave të Ministrisë së Financave, prej të cilave 11 kanë mbështetje nga buxheti i shtetit./Dosja.al
