Kthesë e papritur e motit, zonat malore të Kukësit mbulohen nga dëbora

Reshje dëbore janë regjistruar në zonat malore të qarkut të Kukësit, duke rikthyer papritur atmosferën dimërore në mes të pranverës. Fshatrat Shishtavec, Turaj dhe Novosej janë zbardhur nga bora, ndërsa temperaturat kanë pësuar një rënie të ndjeshme gjatë orëve të fundit.

Pamjet nga terreni tregojnë se në disa zona trashësia e borës ka arritur disa centimetra, duke krijuar një situatë të pazakontë për këtë periudhë të vitit.

Sipas të dhënave paraprake nga autoritetet vendore, deri më tani nuk raportohen probleme në qarkullimin rrugor. Akset kryesore mbeten të hapura dhe të kalueshme, ndërsa strukturat përgjegjëse janë në gatishmëri për çdo ndërhyrje të mundshme në rast të përkeqësimit të kushteve atmosferike. Megjithatë, reshjet e dëborës në këtë fazë të pranverës ngrejnë shqetësime për sektorin bujqësor. Aktualisht, pemët frutore ndodhen në fazën e lulëzimit, duke i bërë ato të ndjeshme ndaj temperaturave të ulëta dhe ngricave të mundshme.

Ekspertët e bujqësisë paralajmërojnë se nëse temperaturat vijojnë të bien, mund të ketë ndikim negativ në prodhimin e këtij sezoni.

Nga ana tjetër, fermerët kanë nisur mbjelljen e kulturave bujqësore, përfshirë pataten, për të cilën deri tani nuk raportohen dëme të konsiderueshme. Sidoqoftë, situata mbetet në vëzhgim, pasi kushtet e motit mund të ndikojnë në zhvillimin e mëtejshëm të bimëve.