Plagoset me çifte një person në Bulqizë, autori mendoi që qëlloi kafshët e egra që po i dëmtonin të mbjellat

Një ngjarje e rëndë ka ndodhur në Bulqizë  mbrëmjen e kaluar , ku një person ka mbetur i plagosur me armë gjahu në fshatin Vajkal. Ngjarja ka ndodhur rreth orës 23:00, në një zonë bujqësore të fshatit, ndërsa  autori ka qëlluar me armë gjahu tip çifte, pasi ka dyshuar se në tokën e mbjellë ndodheshin kafshë të egra që po dëmtonin të mbjellat.

Pas kësaj, ai ka parë se ka plagosur një person.

I lënduari është dërguar në Spitalin e Bulqizës, për të marrë ndihmën e specializuar mjeksore. Bëhet me dije se ai ndodhet jashtë rrezikut për jetën.

Policia ka shkuar në vendin e ngjarjes dhe ka nisur hetimet për zbardhjen e plotë të rrethanave të kësaj ngjarjeje. Policia po verifikon të gjitha dëshmitë dhe provat për të sqaruar dinamikën e incidentit, ndërsa ndaj autorit pritet të merren masat procedurale në përputhje me rezultatet e hetimit.