Kryetari i Partisë Demokratike, Sali Berisha, ka akuzuar kryeministrin Edi Rama se po ndërmerr veprime ndaj kryebashkiakut Erion Veliaj nga frika se m...
Mali i Zi mund t’i përfundojë negociatat për anëtarësim në Bashkimin Evropian deri në fund të dhjetorit 2026, nd&e...
AKTUALITET
Lidhën dhe kërcënuan të moshuarën për 1.5 mln € në Austri/ Shqiptari dënohet me burgim të përjetshëm
PiranjatPërditësimi i fundit 13 August 2026, 15:51
Tre shqiptarë, dy prej tyre nga Kosova, janë dënuar nga një gjykatë në Austri për një grabitje të planifikuar në Amstetten, ku objektivi ishte shuma prej 1.5 milionë eurosh.
Njëri prej të pandehurve, 58 vjeç, është dënuar me burgim të përjetshëm, pasi ndaj tij rëndojnë akuza për dy tentativa vrasjeje dhe armëmbajtje pa leje. Ai ka apeluar vendimin. Ngjarja kishte ndodhur rreth një vit më parë, në banesën e një çifti në Amstetten. Autorët kishin hyrë në shtëpi me synimin për të gjetur paratë, por shuma prej 1.5 milionë eurosh nuk ndodhej aty. Në banesë ndodhej një pensioniste, gjë që rezultoi e papritur për grabitësit.
Megjithatë, ata vijuan planin. Njëri prej tyre mbajti nën vëzhgim gruan, ndërsa dy të tjerët kontrolluan banesën në kërkim të parave dhe sendeve me vlerë.
Situata u përshkallëzua kur në banesë mbërriti policia pas një telefonate. I pandehuri 58-vjeçar u përfshi në një shkëmbim zjarri me dy efektivë. Ai pretendoi se kishte qëlluar në ajër, por gjurmët e barutit dhe një vrimë plumbi në një pemë treguan, sipas akuzës, se arma ishte drejtuar në drejtim të policëve.
Ai u arrestua së bashku me një bashkëpunëtor, ndërsa personi i tretë u largua nga vendngjarja. Policia arriti ta kapte tre ditë më vonë.
Në çantën sportive të tij u gjetën radio komunikimi, shirit ngjitës dhe targa automjetesh. Prokuroria i konsideroi këto sende si tregues se grabitja ishte planifikuar me kujdes, ndërsa shiriti mund të përdorej për të lidhur personat që mund të ndodheshin në banesë.
Të tre të pandehurit pranuan akuzat për grabitje. Mbrojtja argumentoi se ata nuk kishin pasur qëllim të ushtronin dhunë ndaj pensionistes dhe se grabitja kishte dështuar, pasi u larguan pa marrë paratë.
Megjithatë, gruaja u kërcënua me levë hekuri dhe lidhëse plastike dhe, sipas vendimit, ka pësuar pasoja të rënda psikologjike, përfshirë çrregullim të stresit post-traumatik. Gjykata i akordoi asaj 7,050 euro dëmshpërblim, ndërsa dy policëve ndaj të cilëve u qëllua iu dhanë nga 5,000 euro secilit për pasojat dhe ngarkesën psikologjike.
Për dëmshpërblimet do të përdoren edhe paratë e sekuestruara nga tre të dënuarit, në shumën prej rreth 8,500 eurosh.
