Ilir Meta ka reaguar përmes një postimi në Facebook lidhur me konfliktin mes GJKKO dhe Dhomës Kombëtare të Avokatisë, duke pr...
AKTUALITET
Lumi Osum del nga shtrati, shkatërron serat në Arrëz – Banorët pa asnjë ndihmë (VIDEO)
PiranjatPërditësimi i fundit 10 January 2026, 17:26
Fshati Arrez, Bashkia Dimal po përballet me përmbytje të vazhdueshme nga dalja e lumit Osum, duke shkaktuar dëme të mëdha në bujqësi dhe duke vënë në rrezik jetesën e mbi 30 familjeve.
Një prej banorëve denoncon se disponon 2 hektarë tokë bujqësore, të mbjella me grurë, jonxhë dhe sera me speca, vetëm 100 metra larg lumit Osum, të cilat janë përmbytur plotësisht disa herë.
“Vetëm gjatë muajit nëntor përmbytja ka ndodhur 3 herë, ndërsa 2 herë të tjera tani së fundmi. Tokat janë shkatërruar, serat janë nën ujë dhe dëmet janë të pallogaritshme”, shprehet banori.
Sipas tij, nuk ekzistojnë kanale kulluese, çka e bën situatën edhe më të rëndë.
“Na kanë thënë: ‘Do vijmë ta shohim’, por askush nuk ka ardhur. Jemi lënë në harresë totale”, thekson ai.
Vetëm për fidanët e serave, dëmi kap vlerën prej rreth 2 milionë lekësh, pa llogaritur humbjet e prodhimit, punën dhe investimin e bërë ndër vite.
Banorët kërkojnë ndihmë emergjente nga shteti, të paktën për kompensimin e fidanëve dhe marrjen e masave konkrete për ndërtimin e kanaleve kulluese, në mënyrë që përmbytjet të mos përsëriten.
“Ne nuk po kërkojmë luks, por ndihmë për të mbijetuar. Kjo tokë është burimi ynë i vetëm i jetesës”, përfundon denoncimi./Piranjat.news
