Pesë persona, përfshirë dy zyrtarë policorë, janë lënduar si pasojë e një aksidenti trafiku që ka ndodhur pa...
AKTUALITET
“Magjistarja” kërcënoi gazetaren dhe kameramanin e “Piranjave”, reagon AGSH: Organet ligjzbatuese të nisin hetimet!
PiranjatPërditësimi i fundit 3 Prill 2026, 13:11
Asociacioni i Gazetarëve të Shqipërisë ka reaguar menjëherë pas kërcënimit të gazetares së emisionit “Piranjat”, Avi Mema dhe kameramanit Nertil Mataj.
Kujtojmë se Piranjat denoncuan rastin e mashtrimit të Elena Demollarit që hiqej si magjistare, pas publikimit të rastit, zonja në fjalë nisi kërcënimet në rrjetet sociale duke publikuar pamje në arkivol të gazetares dhe kameramanit.
AGSH dënon gjuhën kërcënuese dhe përmbajtjen e rëndë të shpërndarë në rrjetet sociale nga shtetasja Elena Demollari ndaj gazetarëve të emisionit “Piranjat”,
Reagimi i plotë:
Asociacioni i Gazetarëve të Shqipërisë shpreh shqetësimin e thellë dhe dënon me forcë gjuhën kërcënuese dhe përmbajtjen e rëndë të shpërndarë në rrjetet sociale nga shtetasja Elena Demollari ndaj gazetarëve të emisionit “Piranjat”, pas publikimit të një investigimi mbi një rast të dyshuar mashtrimi.
Publikimi i imazheve ku gazetarja Avi Mema dhe kameramani Nertil Mataj paraqiten në arkivol, i shoqëruar me mesazhe kërcënuese, përbën një akt të papranueshëm që cenon sigurinë fizike dhe psikologjike të gazetarëve, si dhe përpiqet të frikësojë median për shkak të punës së saj.
AGSH i bën thirrje organeve ligjzbatuese që të marrin menjëherë masa për të hetuar këtë rast dhe për të garantuar mbrojtjen e gazetarëve të përfshirë.
Në një shoqëri demokratike, gazetarët duhet të jenë të lirë të raportojnë dhe të denoncojnë abuzimet pa u përballur me kërcënime apo presione. AGSH qëndron në solidaritet të plotë me ekipin e “Piranjave” dhe do të ndjekë me vëmendje zhvillimet e mëtejshme të këtij rasti.
