Makina del nga rruga pranë Rubikut, dy të plagosur përfundojnë në spital

Një aksident rrugor është regjistruar në segmentin e Rrugës së Kombit, në afërsi të Rubikut.

Sipas informacioneve paraprake, në aksident është përfshirë një automjet, ndërsa është dashur ndërhyrja e ekipeve të emergjencës për nxjerrjen e dy personave që ndodheshin brenda mjetit.

Të lënduarit kanë pësuar dëmtime, por fatmirësisht ndodhen jashtë rrezikut për jetën. Pas marrjes së ndihmës së parë në vendngjarje, ata janë transportuar për kontroll dhe trajtim të mëtejshëm mjekësor.

Policia dhe grupet hetimore kanë nisur veprimet për zbardhjen e rrethanave dhe shkaqeve të aksidentit.