Mali Olimp pranë statusit të Trashëgimisë Botërore të UNESCO-s

Mali Olimp, maja më e lartë e Greqisë dhe simbol i mitologjisë së lashtë, është shumë pranë përfshirjes në Listën e Trashëgimisë Botërore të UNESCO-s. Kërkesa e Greqisë do të shqyrtohet gjatë mbledhjes së Komitetit të Trashëgimisë Botërore, e cila zhvillohet nga 19 deri më 29 korrik në Seul.

Autoritetet greke synojnë që Olimpi të njihet si një sit i përzier, duke vlerësuar njëkohësisht rëndësinë e tij natyrore dhe kulturore. Përveçse konsiderohet vendbanimi legjendar i Zeusit dhe perëndive të Greqisë së lashtë, masivi malor shquhet për biodiversitetin e pasur, peizazhet unike dhe trashëgiminë historike që ruan.

Procesi i nominimit nisi në vitin 2014, por ekspertët e UNESCO-s kërkuan dokumentacion shtesë për të argumentuar më mirë vlerat universale të zonës. Mes rekomandimeve ka qenë edhe zgjerimi i dosjes me përfshirjen e sitit arkeologjik të Dionit, që ndodhet në rrëzë të malit, për të forcuar rëndësinë historike dhe kulturore të kandidaturës.

Nëse miratohet, Mali Olimp do t’i bashkohet listës së vendeve me vlera të jashtëzakonshme për njerëzimin, duke fituar një status që pritet të rrisë mbrojtjen dhe promovimin e tij në nivel ndërkombëtar.