16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
Maqedonia e Veriut ul çmimin e naftës, Shqipëria në vendnumëro
PiranjatPërditësimi i fundit 1 September 2026, 10:06
Autoritetet në Maqedoninë e Veriut kanë njoftuar këtë të hënë (1 shtator 2026) se kanë vendosur të ulin çmimin e karburanteve.
Duke filluar nga sot, nafta (EURODIZEL) do të shitet me 95 denarë/litër ose rreth 1.54 € /litër, kurse benzina BS-95 do të tregtohet me 94 denarë/litër ose rreth 1.53 € /litër. Konkretisht, nafta ka shënuar një rënie me 6,50 denarë për litër.
Por, ndryshe nga vendet e rajonit të cilat po aplikojnë masa lehtësuese për qytetarët, e kundërta po ndodh në Shqipëri.
Qeveria shqiptare hoqi dorë nga Bordi i Transparencës rreth dy muaj më parë, duke deklaruar se mekanizmi do të shfuqizohej përfundimisht. Në periudhën kur Bordi caktonte çmimet e karburanteve në treg, nafta kapërceu ndjeshëm kufirin e normales duke arritur në 265 lekë/litri. Edhe çmimi i benzinës kërceu në 243 lekë/litri.
Nga përditësimi i çmimeve të fundit të karburanteve në Shqipëri, vihet re një rritje e ndjeshme. Dy ditë më parë, çmimi i naftës ishte 219 lekë/ litri, një rritje prej 4 lekësh, ndërsa benzina tregtohej me 198 lekë/litri, duke u shtrenjtuar me 7 lekë.
Pra, ndërsa vendet e rajonit po ndërhyjnë për të zbutur barrën e çmimeve të karburanteve për qytetarët, në Shqipëri qeveria ka zgjedhur të tërhiqet nga çdo mekanizëm i drejtpërdrejtë kontrolli. Në një kohë kur fqinjët ulin çmimet, mbetet e hapur pyetja se cilat janë masat që qeveria shqiptare po merr për të mbrojtur qytetarët nga kostoja gjithnjë e më e lartë e karburanteve.
