Kreu i PD Sali Berisha është kthyer në Tiranë pas vizitës në SHBA, ku në një prononcim të shkurtër nga Rinasi ...
AKTUALITET
Me 300 mijë euro drogë/ Kokaina e pastër dorëzohej në lavazh, arrestohen 3 shqiptarë, njëri sapo ishte liruar
PiranjatPërditësimi i fundit 7 Maj 2026, 22:00
Të gjithë me origjinë shqiptare, njëri banues në Padovë, tjetri në Selvazzano. Korrieri nga Milano ishte pa precedentë penalë. Ata u kapën nga policia gjatë dorëzimit në një autolavazh.
Një burrë mbërrin me një Fiat Punto në një autolavazh në zonën Padova Est, lë makinën e tij dhe hipën në një Mercedes që mbërriti pak më vonë. Të dy lëvizin për një distancë të shkurtër, parkojnë dhe presin. Pranë tyre ndalon një furgon ‘Citroen Jumpy’ dhe drejtuesi i tij u dorëzon një pako.
Nuk arritën të largoheshin, pasi u ndaluan menjëherë nga agjentët e Skuadrës Mobile, të cilët kishin qenë në pritë. Pasi u konstatua se në pako ndodhej drogë, një kilogram kokainë shumë e pastër, dhe se në furgon kishte edhe një bllok tjetër prej një kilogrami, të tre u arrestuan në flagrancë për trafik droge.
Droga, pasi të përzihej dhe ndahej në doza, do të mundësonte shpërndarjen e mbi 6 mijë dozave në tregjet e Padovës dhe provincës, me një vlerë rreth 300 mijë euro. Të arrestuarit, të gjithë shqiptarë, janë një 32-vjeçar banues në Padovë, një 34-vjeçar nga Selvazzano Dentro, të dy me precedentë penalë, si dhe një 50-vjeçar nga Milano pa precedentë. Dy të parët kishin precedentë për trafik droge dhe njëri prej tyre sapo kishte përfunduar masën e arrestit shtëpiak. Për këtë arsye, ata ishin prej kohësh nën vëzhgimin e forcave të rendit.
Operacioni u zhvillua mbrëmjen e së hënës. Agjentët e Skuadrës Mobile vunë re sjelljen e dyshimtë të dy shqiptarëve që u takuan në autolavazh dhe më pas, me Mercedesin, u zhvendosën pak më tej ku pritën një furgon. Një sjellje tipike e një takimi të organizuar paraprakisht. Më pas ndodhi shkëmbimi: 50-vjeçari me furgon u afrua pranë tyre, shkëmbyen disa fjalë si njerëz që njiheshin më parë dhe ai dorëzoi pakon me kokainë njërit prej bashkëkombësve, i cili e fshehu menjëherë poshtë sediljes së pasagjerit.
Ndërhyrja e policisë ishte e menjëhershme. Të tre shqiptarët u bllokuan dhe policia sekuestroi “tullën” me mbi një kilogram kokainë ende në formë të papërzier dhe shumë të pastër. Më pas u kontrollua edhe furgoni, ku u gjet një tjetër bllok kokainë prej 1 kilogrami dhe një pako më e vogël, e paketuar me vakum, me rreth 150 gramë të së njëjtës lëndë narkotike.
Të tre u shoqëruan në komisariat dhe, pas identifikimit dhe verifikimeve, u arrestuan. Më pas policia kontrolloi edhe banesat e tyre, por pa gjetur drogë tjetër.
Hetimet zbuluan se dy prej tyre kishin precedentë penalë. 34-vjeçari, i lindur në Shqipëri dhe banues në Padovë, ishte dënuar me 4 vite burg pasi ishte arrestuar në Padovë në vitin 2021. Atëherë ai ishte ndaluar duke drejtuar një furgon me mbi një kilogram marijuanë, ndërsa në shtëpi i ishin gjetur gjysmë kilogrami kokainë, një peshore elektronike precize dhe materiale për paketimin e dozave.
Ai rezultonte gjithashtu i denoncuar në vitin 2025 bashkë me një bashkëkombës dhe katër tunizianë për trafik kokaine në Padovë dhe provincë.
Edhe ndaj 32-vjeçarit, i lindur në Shqipëri dhe banues në Selvazzano Dentro, rezultuan precedentë dhe dënime për vepra të lidhura me narkotikët. Ai kishte përfunduar vetëm 20 ditë më parë arrestin shtëpiak, pas një dënimi me 2 vite e 8 muaj burg, sepse në vitin 2025 ishte kapur me 120 gramë kokainë të fshehura poshtë timonit të makinës së tij. Më parë, në vitin 2022, ishte arrestuar sepse transportonte në makinë rreth 12 kilogramë hashash dhe marijuanë, si dhe mbi 7 kilogramë kokainë.
Ndërsa ndaj 50-vjeçarit shqiptar nga Milano nuk rezultuan precedentë penalë apo policorë.
