Një veprim i zakonshëm që shumë njerëz e bëjnë pa e menduar, si shtypja e përsëritur e butonit të ashensorit...
AKTUALITET
‘Më jep paratë ose do vdesësh’/ I mori mikut të tij 30 mijë euro, arrestohet shqiptari në Itali
PiranjatPërditësimi i fundit 29 Korrik 2026, 12:45
Një 26-vjeçar me origjinë shqiptare është arrestuar në Ankona të Italisë, pasi dyshohet se për muaj me radhë ka kërcënuar dhe zhvatur një mikun e tij, duke i marrë rreth 30 mijë euro, të cilat më pas i përdorte për baste online.
Sipas mediave italiane, gjithçka nisi nga një miqësi e krijuar në një bar. Fillimisht, shqiptari i ishte afruar 30-vjeçarit dhe kishte fituar besimin e tij, por më pas nisi t’i kërkonte vazhdimisht para, fillimisht me justifikime, e më vonë përmes kërcënimeve.
“Duhet të më ndihmosh, nëse je mik e bën këtë”, ishte një nga frazat që, sipas hetimeve, përdorte për ta bindur viktimën. Kur ai refuzonte, kërcënimet bëheshin më të rënda: “Më jep paratë para se të zemërohem” dhe “Nëse nuk m’i jep, do ta pësosh”.
Nga marsi deri në qershor, 30-vjeçari i dorëzoi fillimisht të gjitha kursimet e tij, rreth 14 mijë euro, ndërsa më pas u detyrua të merrte edhe tre kredi, një prej 10 mijë eurosh dhe dy të tjera nga 2 mijë euro secila, vetëm për t’ia dhënë shqiptarit. Sipas hetimeve, 26-vjeçari i përdorte paratë për baste online, ku dyshohet se humbi pothuajse 30 mijë euro.
Ngjarja mori fund të premten, kur shqiptari shkoi në banesën e viktimës për t’i kërkuar sërish para. Ai dyshohet se goditi me shqelma derën e apartamentit, duke e dëmtuar atë. I tmerruar, 30-vjeçari telefonoi numrin e emergjencës 112 dhe njoftoi edhe babanë e tij.
Në vendngjarje mbërritën patrullat e policisë dhe efektivët e skuadrës mobile, të cilëve viktima u rrëfeu se prej muajsh jetonte nën kërcënime të vazhdueshme dhe i jepte para nga frika se mund të vritej.
30-vjeçari u transportua në spital në gjendje të rëndë shoku, ku mjekët i caktuan 20 ditë prognozë mjekësore.
26-vjeçari shqiptar u arrestua me akuzat për tentativë zhvatjeje me rrethana rënduese, zhvatje të vazhdueshme dhe plagosje. Arrestimi i tij u konfirmua nga gjyqtari për hetimet paraprake, i cili vendosi ndaj tij edhe masën e ndalimit të afrimit ndaj viktimës, të shoqëruar me byzylyk elektronik.
