Media italiane: Marrëveshja Meloni-Rama rrezikon të dështojë, qendrat në Shqipëri drejt mbylljes

Sipas artikullit, qendrat e ngritura në Shëngjin dhe Gjadër, të konsideruara si një nga projektet kryesore të qeverisë Meloni për menaxhimin e flukseve migratore, rrezikojnë të mbyllen pas dy vitesh vështirësish dhe kontestimesh ligjore.

Gazeta thekson se dy çështje të rëndësishme janë aktualisht në shqyrtim në Gjykatën e Drejtësisë së Bashkimit Europian, të cilat mund të ndikojnë drejtpërdrejt në të ardhmen e protokollit mes Romës dhe Tiranës.

“Marrëveshja me Edi Ramën po rrezikon vlefshmërinë e dy çështjeve në pritje para Gjykatës së Drejtësisë të Bashkimit Evropian. Çështja e ngritur nga Gjykata e Apelit të Romës ngre dyshime rreth vetë legjitimitetit të nënshkrimit të marrëveshjes ndërkombëtare. Në përfundimet e saj, Avokatja e Përgjithshme Laila Medina nga Letonia argumentoi se Protokolli Romë-Tiranë shkel Traktatin për Funksionimin e Bashkimit Evropian (TFBE) sepse shtetet anëtare nuk mund të hyjnë në marrëveshje që shkelin ose rrezikojnë të shkelin ligjin e BE-së. Strukturat në Shengjijn dhe Gjader e bëjnë këtë në disa pika. Njëra është e pakapërcyeshme: një azilkërkues, lirimi i të cilit është urdhëruar nga një gjyqtar, nuk mund të lirohet menjëherë, siç kërkohet nga Neni 6 i Kartës së të Drejtave Themelore të Bashkimit Evropian”, argumentohet më tej në shkrim.

Sipas Il Manifesto, në opinionin e saj, Avokatja e Përgjithshme e Gjykatës së BE-së, Laila Medina, ka argumentuar se marrëveshja mund të jetë në kundërshtim me Traktatin për Funksionimin e Bashkimit Europian, pasi shtetet anëtare nuk mund të lidhin marrëveshje që bien ndesh me të drejtën europiane.

Artikulli vë në dukje se një nga problemet kryesore lidhet me faktin se azilkërkuesit, për të cilët një gjykatë urdhëron lirimin, nuk mund të lirohen menjëherë në qendrat e ngritura në Shqipëri, çka, sipas argumentimit të paraqitur, bie ndesh me Kartën e të Drejtave Themelore të Bashkimit Europian.

Sipas gazetës, qendrat në Shqipëri kanë hasur gjithashtu pengesa në përdorimin e procedurave të përshpejtuara të azilit, pasi gjykatat italiane dhe ato europiane kanë kundërshtuar qasjen e qeverisë italiane mbi konceptin e “vendeve të sigurta të origjinës”.

Në këtë situatë, Meloni po promovon idenë e ngritjes së qendrave për emigrantët në vende të treta, por këtë herë në kuadër të një politike të përbashkët europiane.

Sipas Il Manifesto, kjo qasje mbështetet nga disa vende të BE-së, si Danimarka, Greqia, Gjermania, Austria dhe Holanda, ndërsa Franca dhe Spanja kanë shprehur rezerva.

Artikulli shton se ndër vendet që përmenden jozyrtarisht si destinacione të mundshme për qendra të tilla janë Ruanda, Uganda, Uzbekistani dhe Kazakistani.