"Merr flakë si pushka e jevgut"/ Zv. Ministrja Majko: Rast i përsëritur. Do t‘i drejtohemi institucioneve

Deklaratat me gjuhë diskriminuese në mediat shqiptare vijojnë të ngjallin reagime, pas një tjetër rasti të bërë publik në emisionin “Ferma VIP”, ku moderatorja përdori një shprehje me konotacion fyes. Lidhur me këtë situatë, zv.ministrja Majko e cilëson fenomenin si të përsëritur dhe shqetësues, duke theksuar se institucioni i AMA-s do të vihet në lëvizje përmes një kërkese zyrtare. Në një intervistë për Piranjat News, ajo nënvizon ndikimin negativ që kanë këto deklarata në paragjykimin e komunitetit rom, ndërsa apelon për më shumë përgjegjësi nga mediat dhe figurat publike.

INTERVISTA E PLOTË

1. Mund të ndani një opinion në lidhje me deklaratën e bërë në emisionin televiziv “Ferma VIP”, nga moderatorja Arbana Osmani, e cila iu drejtua njërit prej konkurrentëve me shprehjen: “Merr flakë si pushka e jevgut”?

Ne kemi një institucion që quhet AMA, i cili merret me këto çështje, dhe jemi duke përgatitur një letër për t’iu drejtuar atyre. Kur ekzistojnë institucione përkatëse ku mund të adresojmë shqetësime të tilla, ne ndjekim rrugën institucionale.

Kjo deklaratë nuk është një rast i izoluar vetëm në media. Para disa ditësh, zonja Kryemadhi përdori termin “tregu i gabelëve”. Gjithashtu, edhe Moza Ahmeti , u shpreh: “Rroba banjo te Gabi”.

 Pra, nuk është diçka e papërsëritur dhe unë, si zv.ministre, jam duke punuar për të bërë diçka konkrete që kjo situatë të ndryshojë.

2. Sa ndikojnë realisht këto deklarata të bëra në media në paragjykimin e këtij komuniteti?

Absolutisht që ndikojnë. Nëse do të bëja një krahasim, është njësoj sikur t’u vendosësh veriorëve një epitet, me të cilin edhe ata nuk ndihen mirë kur i cilëson. Çdo njeri ka të drejtë të quhet ashtu siç dëshiron të quhet.

Ne quhemi romë dhe jo me epitete që kanë konotacion përçmues. Në momentin që njerëzit nuk e kuptojnë këtë, mendoj se duhet të vendosen përpara përgjegjësisë.

3. Nëse keni një mesazh për mediat, personazhet publikë apo këdo që mund të bëjë deklarata apo përdorë epitete të tilla raciste apo diskriminuese?

Më vjen mirë që kjo temë po trajtohet. Ne jemi duke punuar, por mentaliteti, fatkeqësisht, nuk ndryshon as brenda një jave, as brenda disa muajsh apo vitesh. Fakti që sot kemi figura si unë në këto pozicione, i sfidon këto mentalitete.

Unë, përmes punës sime, do të bëj të pamundurën që këto raste të mos përsëriten dhe gjërat të ndryshojnë për mirë. Megjithatë, e dimë që racizmi nuk mund të zhduket plotësisht, por mund të punojmë që institucionet t’i vendosin këta individë përpara përgjegjësisë./Piranjat News