Gjyqtarët e Republikës kërkojnë zbatimin e menjëhershëm të vendimit të Gjykatës Kushtetuese për pagat e magj...
AKTUALITET
Morën leje për kullë/ Vëllezërit Veshaj në shërbim të propagandës së Ramës: Jemi pro investimit në Zvërnec
PiranjatPërditësimi i fundit 7 Qershor 2026, 11:35
Podcasti i Vëllezërve Veshaj është zhvendosur mbrëmjen e djeshme në bregdetin e Vlorës, ku të ftuar ishin ish-futbollisti vlonjat Basil Ruci, sipërmarrësi Bruno Musa, Rinald Bezhani dhe këngëtari Renato Jaho. Gjatë diskutimit, të ftuarit u shfaqën në një linjë të qartë mbështetëse ndaj projektit të shumëdebatuar të Zvërnecit, duke argumentuar se investimi do të sillte zhvillim ekonomik dhe turizëm për zonën.
Por ajo që ka tërhequr më shumë vëmendje nuk ka qenë vetë debati, por koha kur ai u zhvillua. Ndërsa prej ditësh në Tiranë dhe qytete të tjera po organizohen protesta kundër projektit në Zvërnec dhe në mbrojtje të zonave natyrore, Vëllezërit Veshaj nuk kanë bërë asnjë reagim publik për këtë çështje.
Kjo heshtje është lidhur nga shumë përdorues të rrjeteve sociale me lajmin e bërë publik pak ditë më parë, sipas të cilit vëllai i tyre, Donald Veshaj, dhe kompania e tij rezultojnë përfitues në një projekt për ndërtimin e një kulle 33-katëshe në qendër të Vlorës.
Në rrjet nuk kanë munguar komentet ironike, ku shumë qytetarë pyesin nëse podcasti i Vlorës ishte një diskutim i lirë apo një “panel promovues” për investimet strategjike. Të tjerë kanë vënë në dukje se ndërsa artistë, aktivistë dhe figura publike kanë marrë qëndrime për protestat, Vëllezërit Veshaj kanë zgjedhur të flasin për zhvillimin dhe investimet pikërisht në momentin kur debati publik është ndezur më shumë se kurrë.
Mes reagimeve dhe ironive në rrjet, një pyetje po shtrohet gjithnjë e më shpesh: A po flasin Vëllezërit Veshaj si qytetarë të shqetësuar për zhvillimin e Vlorës, apo si përfitues të projekteve të mëdha që sot ndihen të detyruar të mbrojnë çdo investim strategjik që promovon pushteti?
