Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudh&eu...
AKTUALITET
"Mos u mërzit se zërin kështu e kam unë"/ Qytetarja reagon kundër projektit "TID": Të dalin këto socialistët e bashkisë që kanë nga tre-katër shtëpi
PiranjatPërditësimi i fundit 19 May 2026, 21:44
Një përplasje ka ndodhur ditën e sotme mes qytetarëve dhe politikanëve, gjatë mbledhjes së Komisionit të Posaçëm Parlamentar për Reformën Administrativo-Territoriale në qytetin e Durrësit. Banorët kanë reaguar ashpër për projektin "TID", i cili rrezikon të prekë banesat e tyre, ndërsa kanë theksuar se po u vidhen pronat.
Gjatë mbledhjes, një qytetare ka marrë fjalën dhe iu është drejtuar të pranishmëve duke thënë se projekti po iu merr banesën pa të drejtë. Qytetarja, Rita Kazazi tha se banorët nuk janë informuar më parë për projektin, por thjesht kanë marrë një letër ku iu është kërkuar të lënë banesën.
Sipas saj, bashkia nuk ka dhënë shpjegime në lidhje me këtë, duke u justifikuar me pretendimin se është "projekt publik". Më tej, ajo i tërhoqi vëmendje politikanëve që ta dëgjonin, ndërsa shtoi se punonjësit socialistë të bashkisë kanë nga tre-katër banesa.
“Unë jam Rita Kazazi e grupit TID. Ne po na merret shtëpia me të padrejtë. Projekti TID pa na informuar, pa na lajmëruar pa asgjë fare, një ditë të bukur na vjen një letër për të dalë nga shtëpia. Projekt publik thotë bashkia. Keni dëgjuar në ndonjë vend të botës të të prishet shtëpia, me hipotekë, me tokë, me tapi të vjetër, në mes të Durrësit?
Mos u mërzit se zërin kështu e kam unë, mos u shqetëso ti, se unë nuk shqetësohem kur bën ti kështu. Tani, ty s’të merret shtëpia. Të më dalin këto socialistët e bashkisë që kanë nga tre-katër shtëpi. A i shembet shtëpia ndonjërit prej këtyre?” tha qytetarja.
Prej disa muajsh banorët po protestojnë para ambienteve të bashkisë, pasi projekti u rrezikon atyre pronat, ndërsa kanë akuzuar institucionet për mungesë transparence. Sipas protestuesve, vendimmarrja për pronat e tyre po bëhet pa asnjë konsultim publik dhe pa sqarime mbi pasojat konkrete për familjet e prekura.
Projekti TID është një nismë e qeverisë shqiptare që synon të kthejë zonën arkeologjike të qytetit në një park të madh urban. Bashkia e Durrësit ka lajmëruar se më 16 shkurt duhet të largohen vullnetarisht nga banesa për të vijuar me realizimin e Projektit TID.
